Mayuh saru fakta sejarah enda dipereti enggau betul
KUCHING: Semua peranak Malaysia patut berati enggau dalam reti Hari Malaysia ti dikeingat sereta diintu kena 16 September tiap taun dikena ngelai penyerakup pengudah Sarawak, Sabah sereta Malaya (Persekutuan Tanah Malayu) numbuhka Malaysia.
Pemerati Politik, Dr Saudi Narani madahka dikena ngingatka hari besejarah nya perintah ke sebedau tu semina ngerami hari nya di Sabah enggau Sarawak kelimpah netapka nya hari nyadi hari besai.
“Nya alai ke tuju penyerakup enggau sejalai di Malaysia, hari nya patut 16 September.
“Semua peranak Malaysia patut berati enggau dalam reti Hari Malaysia 16 September, pia mega rayat Sarawak, laban kitai sama dalam sebuah menua. Aram meh kitai seati tauka sejalai sereta sama maju dalam penyerakup.
“Kitai sebuah menua ti tegap sereta bedaulat lalu anang meh ngasuh ketegal bisi penyaru ba runding ngachurka kitai,” ku iya madah ngagai Utusan Borneo.
Saudi ti mega Lecture Kanan Sains Pentadbiran & Pengajian Polisi UiTM Sarawak mansutka penemu nya lebih dipinta ngenang Hari Malaysia ti diintu kitai seharitu 16 September, lebih agi bekaul enggau penemu sekeda orang ti bebida pasal Sarawak ti enggau numbuhka Malaysia.
“Ngerami 31 Ogos enggau 22 Julai enda salah, tang ngena skala ti dikurangka tauka mit. Ke pemadu patut dikemerat tauka dikerami kitai iya nya Hari Malaysia.
“Laban enti kitai kelalu mayuh pengerami ke diintu (nengeri), kitai deka kelalu geocentric lalu tu enda manah ke penyerakup menua,” ku iya.
Berindik ari pekara nya ku iya, runding rayat lebih agi di Semenanjung patut berubah senipak enggau fakta sejarah ke amat lalu ukai terunda enggau Hari Merdeka 1957, laban nya (1957) hari Persekutuan Malaysia ukai Malaysia.
Menua di Semenanjung, sida merdeka ari British kena 31 Ogos 1957, lalu nya dikelai enggau Hari Kemerdekaan ti diintu tiap taun, ku iya.
“Sekalika sejarah tauka fakta dalam sejarah enda ulih dipereti enggau betul, ngujung mayuh orang saru.
“Rayat Malaysia berengkah arap iya nya menua ti nyadi Hari Merdeka enggau berebak enggau nya ngelai penumbuh Malaysia kena 31 Ogos 1963. Nya maya baka ni Malaysia diperambu tang menua baru semina ditumbuhka kena 19 September 1963. Hari nya iya nya hari bulan sehari tu (16 September),” ku iya.