SMK Marudi champion Pekit ‘Bahas Piala Ketua Menteri Zon Miri’

MIRI: Sekulah Sekondari ( SMK) Marudi nandu pemujur sida menggi gelar champion Pekit ‘ Bahas Piala Ketua Menteri Zon I ( Miri)’ kemari.

SMK Marudi ti nyabung Norhelma Biute Veronica Roni, Susiza Andrew, Mithchelle Birai enggau Sandra Louisa Sargious mai pulai RM1,500 enggau trofi.

Nambahka pemujur nya, Mithchelle Birai udah dipadu nyadi ‘ Pembahas Terbaik’ lalu nerima RM500 enggau trofi.

Pekit Bahas Piala Ketua Menteri berengkah diatur kenyau ari taun 1986 lalu nerima penyereta ari sekula sekondari.

Kenyau ari nya, SMK Marudi udah suah menggi gelar champion renggat Zon I sereta kala nyadi champion pekit renggat kepenudi dua taun ke udah.

SMK Long Lama ti nyadi tim penyakal mega enda pulai enggau jari puang pengudah sida mega nerima RM1,000 sereta trofi.

SMK Long Lama nyabung Nazatul Farhana Idayu, Beatrice Aren Wan, Maureske Stewart enggau Domenick Unggum.

Nangkan nya, Kaban Kunsil Nengeri ( ADUN) Piasau, Datuk Sebastian Ting madahka pekit nya ulih ngangkatka pengawa bekenaka Jaku Melayu.

“Pengawa ngangkatka Jaku Melayu patut ransing dipejalai sereta semua raban patut kering ati,” ku iya.

Tambah mega, bala komuniti enggau rebak biak kemaya hari enda ulih nejuka Jaku Melayu pia aja laban tu nyadi kelai, penempa diri enggau temegah bansa.

“Taja pia, kitai mega enda ulih nulak pemesai guna Jaku English ti nyadi jaku dunya laban iya beguna amat nyadi batang jaku randau antarabansa,” ku iya madah nyemetak.

Ngelansa silik, Sarawak mega ku iya bela ngangkatka Jaku English nyadi batang jaku ba atur pengawa perintah.

“Nya kebuah perintah nengeri Sarawak meri peransang ngambika rebak biak nguasa Jaku English tang enda ngelaungka Jaku Melayu,” ku iya nerang.

Sama bisi datai Pemesai Pelilih Miri, Abdul Aziz Mohd Yusuf, Ketuai Unit Ngatur Pekara Akademik Opis Pelajar Miri, Dr Ling Mei Teng, Pemangku Injinir ngarika Menijar Stesen Miri, Mut Wam sereta Ketuai Bagi Pekara Merambu SarawakFM, Saptuyah Kipli.