Sarawak enda kala masuk Malaysia: Riot

SERIAN: Menteri Besai Tun Dr. Mahathir Mohamad ngaku Sarawak siti ari menua besai maya numbuhka menua baru Malaysia ba taun 1963, ku Kaban Parlimen(MP) Serian Dato Sri Richard Riot.

Berindik enggau nya, Riot madah Sarawak ukai siti nengeri dalam Malaysia tang siti menua besai.

“Kena 16 September 1963 menua baru Malaysia ditumbuhka empat bagi menua iya nya Sarawak, Sabah, Singapura enggau Malaya.

“Anang sekali ngumbai kita masuk Malaysia. Kitai enda kala masuk Malaysia,” ku iya.

Riot mansutka jaku nya ba program ‘Malaysia Day Ride’ Pelilih Serian ke diatur di Tiyab Lanting, Kampung Pichin.

Iya nambah, kena Hari Tiga tu tadi sida raban MP ari Gabungan Parti Sarawak(GPS) bisi betemu enggau Dr Mahathir lalu bisi ngenataika pinta hak ke disetuju dalam Sempekat Malaysia 1963(MA63) diberi pulai.

“Kitai mega minta, enti ngelama ke udah Sarawak enggau Sabah dikelala nyadi dua bengkah nengeri dalam Malaysia, kitai ukai pia.

“Dr. Mahathir setuju enggau penemu kami nya ke alai Sarawak enggau Sabah patut dikelala nyadi dua bengkah menua,”ku Riot.

Program ‘ Malaysia Day Ride’ kemari digulu lebih 250 iku orang ke mai mutusikal besai.

Raban tu ngejang ari Stadium Serian nuju Tebedu lalu ngetu di Tiyab Lanting, Kampung Pichin ke alai mayuh bengkah main bisi diatur.

Ngenang kaum ke sama, Riot merambu ngadu program ke sama ba pengujung taun tang serak nya ila nuju Balai Krangan.

NYADIKA KENANG: Sekeda ari lebih 250 iku raban orang mai mutusikal besai nuju Tebedu ke diuluka Riot.

KAMI ASA : S4S ngadu gempuru likun di Padang Merdeka kemari.