PH Sri Aman besaup mantu peranak Rh Augustine, Gran Limu ti tasah angus
KUCHING: Pakatan Harapan (PH) Sri Aman berumban ngesah peranak Rumah Augustine Sait, Gran Limu, Stumbin ti dituntung penusah angus kena lemai penusah nyadi, 13 September tu tadi.
PH diuluka Yen Jebeni ari Parti Keadilan Rakyat (PKR) Sri Aman enggau Sapit Chairman Parti Tindakan Demokratik (DAP), Leon Jimat Donald sereta bala bukai besaup bebelika barang ti deka dianjung ngagai raban ti tasah angus.
Kerejasama bebelika barang tu dipujur asil ari randau begulai raban ari PKR enggau DAP ti bela sepenemu enggau saum tuju mantu peranak rumah panjai nya.
Ku Yen, ti nyadi chalun Ketuai Pampang PKR Sri Aman maya bepilih parti tu ila, bantu ari sida tu kelai penyinu enggau pengasih.
“Bantu tu dikearap ulih ngelempungka tating penusah sida lalu kami ngarapka sida liat ati napi penusah tu,” ku Yen.
Dulu hari nya, kena 14 September, raban sida mega bisi ngatur pejalai ngabas peranak ba Gran Limu lalu berandau enggau Tuai Rumah Augustine Sait, ngempung penerang ti deka dianjung ngagai Opis Sapit Menteri Dagang Dalam Menua, Koperasi enggau Pekara Penguna (KPDNKK), Chong Chieng Jen.
“Kitai ngarapka agih belanja ulih diberi enggau naka penyampat ngambi ngemuntangka peranak ditu mutarka diri betapi enggau penusah.
“Kitai mega benung ngiga belanja enggau tulung ari mensia mayuh ngambika diberi ngagai peranak Rumah Augustine.”
Antara tulung ti bisi diberi nyengkaum barang pemakai enggau barang diguna bese- hari sehari.
Ba penusah ti nyadi urung pukul 2.30 lemai kena Hari Empat tu tadi, 21 pintu bilik angus lengis ti dipelaba bepun ari dapur kayu.