Dayak mayuh tanah, anang ngelakka tanah repa nadai dikemansang
TISAK, Betong: Sida ti bempu tanah patut sedarka penguntung ari ngemansangka tanah ari ditejuka repa pia aja lalu nadai mansutka sebarang asil.
Komuniti Dayak kelebih agi Iban endang tebilang mayuh tanah ti manggai beratus ikar tang tikas idup mengkang baka 10 ngagai 15 taun suba, nadai entu berubah.
“Pekara tu chukup ngasuh ati sinu laban pemesai tanah dikemisi nitihka pematut komuniti Iban udah bulih gelar orang pemisi ari pengawa betanam betupi dagang besai ba tanah sida empu,” ku Dr Rayong.
Kaban Kunsil Nengeri (ADUN) Engkilili Dr Johnical Rayong Ngipa mansutka jaku nya lebuh bejaku bejadika Program Merarau Pemesai Begulai Enggau Rayat ba Rumah Ensudin Sagal, Tisak, Lidong ensana.
Ku iya, sida ti bisi ati betanam enggau betupi patut bisi tagit ba pengawa betanam betupi chara moden enggau besai agi ngambika bulih mayuh agi untung.
“Manah agi produk ti dipansut patut dikemayuhka agi bansa lalu enda ngemeratka siti bansa aja. Tu dikena ngurangka pengerugi enti sema betapi enggau rega utai tanam ko- moditi nya labuh,” ku iya.
“Diatu, semua rega utai tanam komoditi baka sawit, lada chelum, koko, getah enggau ke bukai nurun ngujungka raban bumai enggau bekebun kusut runding sekalika deka nampung tauka ngetu enda lama pengawa sida,” ku iya, seraya nambah, sida patut nampung pengawa laban rega ti nurun nya enda lama aja.
Nya alai Dr Rayong ngarapka Perintah Pakatan Harapan nengah Opis Menteri Bumai enggau Betanam Betupi ulih bejalaika pengawa dikena ngurangka pengerugi raban bumai ba nengeri tu.
“Kitai beratika penurun rega tu ngenyit kenyau ari pun bulan Mei lalu bedau mandangka rega pulai manah, belanja ngintu enggau barang bukai baka sum, rachun enggau pemakai jelu tupi majak niki taja Chukai SST dipejalai,” ku iya madah nyemetak.
Ngelansa pasal politik, Dr Rayong ngemai rayat nengeri tu seruran bediri teguh ba belakang Kepala Menteri Datuk Patinggi Abang Johari Tun Abang Openg enggau bala ketuai nengeri ba pengawa negika hak Sarawak ti udah disempekat ba Sempekat Malaysia 1963.
“Beserimbai enggau bulan meredeka ti diintu taun tu enggau perintah baru PH, kitai andal amat perintah besai jampat ngamatka semua manifesto sida ngagai peranak Sarawak enggau Malaysia, lalu enda mayuh dalih.
“Kitai enggai ninga sebarang cherita ditempa tang ngamatka semaya bepilih lalu jampat agi mulaika hak Sarawak ba ti bisi ba MA63,” ku iya.
“Kelimpah ari nya, kitai nyukung polisi perintah nengeri neritka Ordinan Perlombongan Minyak 1958 dikena ngulihka asil enggau rega adil agi ari pemansut asal ti diambi ari asil menua Sarawak kelebih agi ngulihka royalti 20 peratus asil minyak lalu ukai nya penguntung baka ti dibantaika perintah PH rambau aum Parlimen tu tadi,” tandu iya.
Sarawak ku Dr Rayong, endang begunaka belanja ti mayuh ari perintah besai belalauka dandang nengeri Sarawak nyauka sebaka pemesai tanah Semenanjung, tentu mega begunaka belanja besai dikena nyendiaka perengka guna infrastruktur kelebih agi ba kandang menua ulu.
“Menteri enggau sapit menteri perintah besai suah nyebut pasal ‘keadilan’ ungkup Sabah enggau Sarawak tang naka diatu, semina jaku ngapa lalu nadai mayuh udah dikereja sida.
“Ambika chunto, isu hak MA63 sereta asil minyak diberi belalauka untung lalu ukai royalti,” ku iya.
Berebak enggau program nya, iya ngemendarka geran Projek Mit Pemansang Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) Rumah Ensudin penyampau RM5,000 lalu Biro Indu nerima RM3,000.
Kelimpah ari nya, sida mega nerima berita manah pengudah bela nerima belanja penyampau RM200,000 ari RTP Dr Rayong taun baru ba kereja tumu ngentak rumah panjai baru nya.
Sama bisi datai Pemesai Kanan Bomba enggau penyah Penusah Betong Henry Jugah, Penghulu Betuk Tubi, Penghulu Nyambong Maweng, bala kaunsilor, bala tuai rumah sereta peranak diau ngelingi Tisak, Lidong enggau Tabut.