Isu suntuk pengajar jaku Iban patut diputarka komiti khas KPM KGBS nyukung penuh atur KPM deka mutarka isu tu lebih agi ba empat buah menua iya nya Selangor, Johor, Sarawak enggau Sabah
KUCHING: Komiti khas ti ditumbuhka Opis Menteri Pelajar Malaysia ( KPM) dipinta lebih ngemeratka pengawa mutarka isu suntuk pengajar nyengkaum pengajar opsyen Jaku Iban, dalam pansik ke deka dipejalaika.
Presiden Kesatuan Guru Bumiputera Sarawak (KGBS), Ahmad Malie madahka, KGBS nyambut manah sereta nyukung penuh atur perintah nengah KPM ti deka mutarka isu suntuk pengajar lebih agi ba empat buah nengeri iya nya Selangor, Johor, Sarawak enggau Sabah.
Bekaul enggau pekara nya iya ngarapka opis menteri ulih milih sereta nyendiaka kursus pengajar enda ngira dini endur di menua tu, meri peluang ti lebih ngagai peranak Sarawak enggau Sabah, sereta pengawa neruska tanggungpengawa IPG lebih agi IPG Kampus Sarawak, Miri enggau IPG Kampus Rajang, Bintangor endang amat relevan.
KGBS minta komiti khas ti ditumbuhka ulih KPM ke dikena mutarka isu suntuk pengajar ulih meda penyuntuk pengajar opsyen Jaku Iban nyadi pekara pemadu dikemerat dalam pansik sida. Ahmad Malie Presiden KGBS
“KGBS minta komiti khas ti ditumbuhka ulih KPM ke dikena mutarka isu suntuk pengajar ulih meda penyuntuk pengajar opsyen Jaku Iban nyadi pekara pemadu dikemerat dalam pansik sida.
“Laban pengajar opsyen Jaku Iban semina bisi sepenyampau 2,240 iku. Nyema penyuntuk pengajar opsyen Jaku Iban tu enda ulih diputarka enggau chara komprehensif, udah tentu deka nyadi isu kritikal pelajar ba nengeri Sarawak.
“Perintah nengah KPM patut nambahka pengawa ngambi anak Sarawak ti dilatih nyadi pengajar ba IPG nya dikena napi penanggul suntuk pengajar ti majak nambah lebuh pengajar majak mayuh bersara dalam timpuh dua taun ke deka datai nitihka opsyen,” ku iya madah ngagai Utusan Borneo.
Ahmad meri penemu nya lebuh ditanya bekaul enggau KPM ke udah numbuhka sebengkah komiti khas dikena ngiga chara pemadu manah mutarka penanggul suntuk pengajar ba sekeda nengeri lebih agi di Johor, Selangor, Sabah enggau Sarawak.
Sapit Menteri Pelajar Teo Nie Ching madahka entara lebuah suntuk pengajar ba empat nengeri nya iya nya ungkus idup ti tinggi enggau penyauh sekula di menua ulu.
Nambahka nya, KGBS ngarapka nengah komiti nya ukai semina mutarka penanggul suntung pengajar tang nambahka elawin ungkus idup sereta meri elawin tambah, ku Ahmad.