Penyampau nembiak ba ulu Baram masuk sekula mimit

LONG MIRI, Baram: Penyampau bala nembiak mit ti masuk sekula tebal agi sekula di menua ulu Baram majak mimit.

Kaban Kunsil Nengeri ( ADUN) Telang Usan Dennis Ngau madah, runding negetif sekeda apai indai ba menua ulu senentang pelajar nyadi pun penanggul penyampau tubuh nembiak ti besekula nurun.

“Mayuh kebuah pekara tu nyadi. Antara iya, penuduk rama enggau ekonomi peranak ba menua ulu ti enda meransang bala anak sida besekula,” ku iya rambau pengawa bejadika karnival SK Long Miri, kena Hari Enam tu tadi.

Ku Dennis, antara kebuah bukai iya nya badu sekula tumu enggau mindah ngagai kandang mengeri.

Penyampau tubuh nembiak ti nurun nyata amat dipeda ba sekula primari ba sitak menua dipegai iya.

Berindik ari nya, iya minta bala pengajar bejalaika pangku pengawa nambahka penyedar enggau pemereti ati apai indai enggau sida ti ngibun senentang pemesai guna pelajar bala anak sida.

“Agi bisi ngembuan runding ulih idup taja nadai pelajar. Runding baka tu endang enda manah. Nadai pelajar menyana, bala anak kitai deka napi pemar ba dunya moden kemaya hari, lalu tusah ngiga kereja,” ku Dennis madah nyemetak.

Iya mega dekaka bala pengajar ba Baram nemu pekara pemansang nengeri enggau menua tu kelebih agi pekara ekonomi rama.

Ngelansa pasal japai SK Long Miri, ku Dennis, penyulut dijapai ketehal semengat, pengeran enggau bisi juluk tinggi bala, pengajar, nembiak, bala staf enggau apai indai.

Taja mayuh penyuntuk, sekula ngasaika mayuh pemujur ti ngasuh ati temegah sereta ngayanka penau sida sebaka enggau sekula ba mengeri.

Sama bisi datai Penolong Kanan Kepala Pengajar Rezina Malik enggau Chairman PIBG Tinggang Pahang.