Sarang Kelulut dipenggi KUBK diatu udah bisi mansutka asil
KAPIT: Kaban Parlimen (MP) Kapit Datuk Alexander Nanta Linggi enggau Kaban Kunsil Nengeri ( ADUN) Bukit Goram Jefferson Jamit Unyat disempulang bala bukai bisi bejalai ngabas Sarang Kelulut diempu Koperasi Usahawan Bumiputera Kapit Berhad (KUBK) ba Jalai Aman, Melekun ditu, kemari.
Antara sida ti bisi nyempulang pejalai nya Sapit Residen Bagi Menua Kapit, Galong Luang, Sekretari Politik Kepala Menteri Sarawak – Tapah Ata enggau Maurice Giri, Pemesai Pelilih Kapit Elvis Didit enggau Pemesai Pelilih Bukit Mabong Douglas Pungga enggau Penulung Direktor Opis Betanam Bet- upi Kapit Bidin Unor.
Sida sebuat dikangau raban KUBK ngulu pengawa ngaga Sarang Kelulut lalu penatai sida dilaluka bala kaban komiti KUBK ti betuaika Sekretari Martin Bilun.
Marin Bilun meri penerang senentang Kebun Kelulut ti udah dikemendarka KUBK sebedau tu ari Opis Koperasi Malaysia.
“Sebedau kami ngelala taba nupi kelulut, kami udah ngabas mayuh bengkah endur dikena milih taba ti engkeman bejalaika dagang. Udah nya, kami netapka endur tu, Melekun, Jalai Aman ditu laban dandang tanah ti mungkur bemacham bansa pun buah enggau kebun.
“Ditu kitai bisi pun rian, lensat, mango, dabai, kemantik enggau buah masam bukai baka limau, pisang enggau inyak. Pun buah ti bebida deka mansutka bungai bebida musim ngambika kelulut ulih nutu bungai.
“Endur tu kaya enggau utai tumbuh enggau utai idup ti manah ungkup kelulut ngaga madu. Bansa bungai ti bebida mantu ngeluarka ‘perisa’ bebida, ambika chunto, bungai inyak bebida ari akasia,” ku Martin nerang.
“Kitai mujur numbuhka KUBK, meri terima kasih ngagai Opis Koperasi Kapit ti udah ngemendarka peminta kitai. Kitai numbuhka koperasi tu laban ari pengawa ngempung semua orang bumai ba Melekun ditu deka ngempuruka semua pemansut begulai.
“Kelulut begunaka dandang tanah besai endur nirika sarang. Pekara pemadu beguna, kitai ulih nerima bantu enggau lalau profesional ba pekara bantu belanja dikena mantu kitai – belanja enggau atur pengawa bukai baka nungkus enggau startegi makit kena nambahka rega produk kitai,” ku iya.
“Naka diatu manah amat, kitai udah tiga kali muar madu kelulut. Bala kaban ulih ngasaika madu lalu apin lama ke udah, kami bisi ngatur pengawa bejual enggau ngelaku sereta udah nerima timbal chukup manah. Asil ari pengawa bejual dibagi bela antara bala kaban,” ku Martin nambah.
“Madu tu dikerindu semua renggat umur. Tu suplimen pemakai ti chukup manahka pengerai. Iya bebida ari gula ti bisi ba pasar ti tau ngasuh sakit kemi manis enti kelalu mayuh.
“Tambah mega, kesemua bala kaban diatu ngirup segelas madu digulai enggau ai, chukup manah ungkup pengawa ngemeranka pengerai, nyadi anti-oksida dikena nempa batang tubuh kebal ari penyakit. Asil iya, sida ngasaika diri regas sereta kering agi diatu. Tu mih pemanah iya,” ku Martin.
“Madu kelulut ti udah disimpan dalam botol bisi dijual ba Makit Teresang ninting pagi Hari Minggu lalu rega nitihka pemayuh madu - 500 ML, 1000 ML, enggau ke bukai.
Pengudah pejalai nya, Jamit muji bala kaban KUBK ti udah berunding panjai ngaul diri ba dagang madu laban sida nemu bisi awak dagang ba industri nya.
“Bisi pengulih besai ba industri madu. Madu tu ai irup dikerindu. Bisi mayuh pemin- ta ba makit laban iya ngundan nutrisi enggau mayuh guna. Sida ti meli nadai betawar rega ungkup madu chulin. Nya kebuah aku meri peransang ngagai sida ti ngempu tanah ditu ngaul diri ba pengawa nupi madu kelulut, ti tau mansutka belanja,” ku iya.
Iya mega meri peransang ngagai sida ti ngempu tanah enggau raban bumai ngambika ngempung diri empu numbuhka koperasi, ke alai sida tau bulih penguntung ari bantu ti diberi.
Sama bisi ba bangsal ngelalu penatai Jamit iya nya chairman KUBK Watson Awan sereta bala kaban sida, Empati Depa, Martin Bilun, Johnny Pasang, Jeffery Aba Djawie, Johannes Benet, Reineld Panyau, Penghulu Madang Jelaini Jarit Jamit, Penghulu Pasang Tubak enggau Tuai Rumah Richard Engking.