Penyerakup semua rayat pegai perintah baru deka nyadika pengering kitai mantah nama pengawa ke salah
SIBU: Hari Malaysia serak tu patut nyadika pengeransing rayat Sarawak ke dipegai perintah baru ba renggat perintah besai beserakup sereta regas agi gawa bela mai pemansang ngagai nengeri tu.
Presiden Sarawak Workers Party (SWP) Munan Laja madah, penyerakup semua rayat deka nyadika pengering ngagai kitai mantah nama pengawa ke salah.
“Hari Malaysia taun tu diintu kitai ngena semangat ke baru beserakup enggau pangan diri ngambika nengeri Sarawak enda tinggal ari pe- mansang.
“Penyerakup tu deka dikena kitai nyungkakka agi pemerani ngelaban nama utai ke salah.
“Ari penyerakup ke meruan kitai mesti gawa regas agi dikena nentuka nama hak nengeri tu semampai diibun sereta meruan mai pemaik ngagai diri enggau pemansang menua,” pia ku iya madahka penemu beserimbai enggau Hari Malaysia, kemari.
Munan mega madah, penyalah makai suap nyengkaum salah kena kuasa meseti dipunaska enti deka meda menua mansang.
Iya madah, pengawa ngemunaska penyalah nya bela patut dikemeratka semua rayat.
“Kitai mesti berani ukai semina mantah utai ke salah aja tang berani ngelaban sida ke salah ngena kuasa enggau makai suap.
“Anang takut tauka diau diri aja enggaika penyalah baka tu majak nyadi riman nekul pengelantang pengidup sereta pemansang menua,” ku iya madah baru.
Kelimpah ari nya, ku Munan, ubah dunya maya hari tu patut ditunda semua nengah penemu enggau pemandai.
“Enti kitai deka menua menua kitai mansang agi, kitai mega anang enda ngiga penemu enggau pemandai tang ukai semina ngemataka orang aja.
“Kebuah pia laban semua kitai ngempu tanggungpengawa ngemansangka menua diri,” pia ku iya madah.
Ba iya, pelasar menua mansang sigi bepanggai ba rayat empu ti bagas agi gawa sereta ngemeranka penyerakup enggau pangan diri bela nentuka pemansang menua.
Hari Malaysia taun tu diintu kitai ngena semangat ke baru beserakup enggau pangan diri ngambika nengeri Sarawak enda tinggal ari pemansang. Munan Laja Presiden SWP