Dua rumah panjai ba Sebangkoi deka digagaka jematan baru
BETONG: Lebih 200 peranak dua rumah panjai ba Sebangkoi berasai lantang pengudah peminta nukar jematan lama dikemendar.
Jematan baru enggau agih belanja RM100,000 deka nyadi nyata pengudah tinda dibantai pun bulan baru lalu dipelaba tembu dalam timpuh dua bulan.
Pekara nya udah dikemendarka Kaban Kunsil Nengeri (ADUN) Engkilili Dr Johnical Rayong Ngipa ba sebengkah pejalai ngabas kemari pengudah dipadah pasal jematan tebelian sebedau tu rusak ketegal penusah bah apin lama ke udah.
“Pemar ditapi sida jampat nerima perati aku ketegal jematan tu aja jalai nyambung Rumah Panjai Michael Wil- lie enggau Wellis Jarrau ba seberai sungai,” ku iya.
Dr Rayong madah tetiap penanggul ti nekul rayat nyadi penanggul iya lalu patut diberi perati seriris enggau agih belanja ti disediaka perintah nengeri.
“Tu nyata ngayanka tetiap penanggul rayat seruran diberi perati nitihka pematut belalauka polisi Kepala Menteri Datuk Patinggi Abang Johari Tun Openg ti meri pemerat ba pemansang menua pesisir nengeri tu.
“Kitai bisi agih belanja ti chukup ungkup pemansang lalu nadai penanggul ba renggat melanja,” ku iya.
Berindik ari nya, iya dekaka rayat seruran begulai enggau iya nyukung ketuai dipegai Abang Johari kelebih agi ba pengawa negika hak MA63 ti lenyau kenyau ari 55 taun ke udah.
Tu mega dikena nentuka perintah besai diketuaika Pakatan Harapan (PH) ngamatka manifesto sida kelebih agi bekaul enggau 20 peratus royalti minyak lalu ukai belalauka untung baka ti dipadah sida apin lama ke udah.
“Chukup mih kitai dichiping laban enti dibida enggau nengeri bukai ba Semenanjung, kitai jauh tinggal lalu bida takah pemansang Semenanjung enggau Sarawak patut disemak,” ku iya madah nyemetak.
Ba lansa bukai, Tuai Rumah Willie enggau Wellis meri terima kasih besai ngagai pengawa nukar jematan belian ngagai jematan besi ti tegap sereta lantang agi.
“Tentu mega nembiak redak kededua rumah panjai tu berutang budi enggau beterima kasih ngagai YB Johnical ti chukup siruka sebana rayat,” ku Wellie madah ngagai Utusan Borneo.
“Ngelama tu penanggul kami nadai kala diteju pia aja, nya kebuah kami deka nyukung seagi iya ngarika DUN Engkilili laban iya ukai semina peranak asal menua tu aja, tang mega seruran begulai enggau kami nadai ngira senang tauka tusah.”
Sama bisi nyempulang pejalai iya ngabas jematan runtuh nya Injinir Opis Kereja Raya (JKR) Betong Steward Ludan, bala tuai rumah enggau peranak ari Rumah Willie enggau Wellis Jarrau.