Geran MRP mayuh mantu komuniti di menua pesisir
LONG KESSEH: Taja napi pejalai urung empat jam nujah jalai batang semina ketegal deka bejadika kem motivasyen ba Sekula Primari (SK) Long Kesseh ti bisi urung 20 iku nembiak enda ngasuh Kaban Kunsil Nengeri ( ADUN) Telang Usan Dennis Ngau mantul ati ngelimpangka awak iya bejalai ngabas sekula nya.
Ku iya, pekara ti beguna amat, penatai iya ukai semina deka bejadika program nya aja tang mega ngenang pengawa semua raban ti ngayanka pengeran sida ngatur program motivasyen ba sekula nya.
“Penatai aku mega ngayanka semua sekula ba sitak Baram kelebih agi ba Telang Usan mega bela diperati taja bisi penanggul suntuk nembiak.”
“Tu program keterubah diatur ba sitak DUN Telang Usan, Baram enggau kerejasama Universiti Curtin Malaysia. Sebedau tu, program sida ba rumah panjai ba Telang Usan, suah agi meri awak ngagai bala nembiak Curtin Universiti ngasaika peneleba idup ba menua ulu enggau rumah panjai begulai enggau komuniti Orang Ulu.”
Dennis mansutka jaku tu lebuh bejadika Kem Motivasyen diatur Serakup Apai Indai enggau Pengajar (PIBG) SK Long Kesseh, Universiti Curtin Malaysia (Curtin Malaysia) sereta Komiti Genturung Pendiau Long Kesseh kena 14 September tu tadi.
Iya meri terima kasih ngagai semilan fasilitator Curtin Malaysia ti udah ngelimpangka diri pengelama tiga hari berengkah ari 14 September ngemujurka kem nya.
Dennis mega ngelalau komuniti menua ulu Baram ngemeratka pelajar laban tu chara pemadu manah dikena ngubah nasit sida.
Ku Dennis, pelajar nyadi paspot penyulut bala anak dudi hari.
“Kitai patut meri pelajar menyana ngagai bala anak. Ari pelajar tu, bala anak kitai ulih idup meruan agi kelimpah nambahka mobiliti rama,” ku iya.
Siti ari program ti ulih diatur ngangkatka pelajar ba Pelilih Baram kelebih agi ba Telang Usan iya nya nengah program kem motivasyen, ku Dennis.
Ku iya, komitmen deka mantu sebarang aktiviti ti ngaul pelajar enggau sekula sereta merambu ngagai Curtin Malaysia ngambika seruran mantu komuniti ba Telang Usan ba pengawa ngemai input ti tau ngubah runding deka maju.
Ku iya, bisi empat komponen ti nyadi akar ngangkatka pelajar iya nya bala anak ti deka belajar, kedua pengeran apai indai deka nempa pemujur, ketiga pengajar ti ngajar bala anak kitai enggau pengingin lalu keempat bala komuniti ba menua nya nyukung tegut program pelajar.
“Nya kebuah aku minta semua peranak genturung pendiau ditu meri kerejasama enggau nyukung aktiviti sekula sereta besaup enggau PIBG.
“Ambika chunto, taja sekula tu semina bisi nembiak enda lebih ari 20 iku aja lalu pejalai jauh nengah jalai batang, tang aku tetap datai laban deka ngayanka pengeran diri kelimpah ngenang pengawa raban sekula enggau Curtin Malaysia ti udah kiruh ngatur kem tu,” ku iya.
Dennis muji pengawa Kepala Pengajar Poul Nanggang kenyau ari dianjung gawa dia mujur ngemai ubah ngagai bala nembiak ba sekula nya.
Berebak enggau nya, Dennis bisi ngemendarka geran Projek Mit Pemansang Menua Pesisir (MRP) penyampau RM10,000 ngagai PIBG SK Long Kesseh dikena mantu sekula ngatur aktiviti sepanjai taun sida.
Sama bisi datai Ketuai Genturung Pendiau Long Kesseh Luat Jok, Ketuai Raban Universiti Curtin Malaysia Maltilda Mae Brain, Ketuai Genturung Pendiau Long Nakan Andrew Jau Anyie enggau Kepala Pengajar SK Long Kesseh Poul Nanggang sereta urung 250 iku bala bukai datai ari Long Kesseh enggau Long Nakan. MIRI: Geran Projek Mit Menua Pesisir (MRP) diagihka Perintah Nengeri udah mayuh mantu rayat kelebih agi komuniti menua pesisir.
Kaban Kunsil Nengeri (ADUN) Telang Usan Dennis Ngau madahka bala penerima datai ari gempung, serakup enggau raban NGO ba genturung pendiau ti nadai ngembuan penatai pemisi meruan sereta mayuh bepanggai ngagai geran enggau bantu perintah.
“Geran MRP tu siti chara dikena perintah mantu enggau ngelawa raban komuniti diselinting ngambika dikena sida bejalaika aktiviti sepanjai taun, nadai ngira penatai asal politik,” ku Dennis madah ngagai The Borneo Post pengudah nyuaka geran MRP ngagai bala penerima.
Sama bisi datai Ketuai Nembiak PBB Telang Usan, Kaunsilor Dominic Nyurang.
Nitih ku Dennis, ba sitak menua dipegai iya, Telang Usan urung 80 genturung pendiau lalu di baruh tetiap genturung pendiau tu, bisi antara tujuh ngagai lapan gempung chulin ti minta geran ungkup aktiviti enggau pemansang sida.
Ambika chunto ku iya, tetiap genturung pendiau bisi mayuh gempung baka Komiti Pemasnang enggau Pengelikun Genturung Pendiau (JKKK), Biro Indu, Raban Nembiak, Serakup Apai Indai enggau Pengajar (PIBG), RELA, raban gerija enggau sekula.
Ku iya, gempung tu minta belanja ti endang peminta tulin ungkup aktiviti sida enggau pengawa pemansang baka nyeleti balai, sekula, parit enggau aktiviti rama sereta pengelantang.
Kelimpah ari 80 genturung pendiau ba sitak Telang Usan, bisi mega gempung ari komuniti Orang Ulu ba Miri ti minta agih belanja enggau geran ti udah diagih kami ngagai sida ngambika bela asi.
“Geran ti diagih tu endang beguna amat ngagai komuniti lalu perintah nengeri di baruh Gagasan Parti Sarawak (GPS) nyata udah ngayanka pengelurus sida mantu rayat,” ku Dennis.
Ba lansa bukai, Dennis meri terima kasih ngagai Kepala Menteri Sarawak Datuk Patingi Abang Johari Tun Openg ti udah ngagihka belanja ngagai bala pengari rayat GPS.
Iya nyemetak madahka tu pengawa dipejalaika perintah nengeri dikena mantu bala komuniti lalu nentuka sida enda tinggal ba belakang ari arus pemansang ba nengeri kelimpah ari nangkup peminta komuniti.
Kitai ti nyadi pengari rayat ngarapka sida deka ngenang bantu ari Kepala Menteri kitai enggau perintah nengeri udah ngemai mayuh agi belanja enggau agih belanja kelebih agi ngagai kandang menua pesisir, ku iya nambah.
Ku Dennis, iya deka seruran ngagihka geran ngagai gempung, serakup enggau NGO ba menua nya ngemai reti mantu komuniti ngenyampatka pemansang ba kandang menua sida.
Antara penerima ti nerima geran MRP iya nya BEM Komuniti Lutong ( RM8, 000), Borneo Evangelica Mission ( RM5, 000), SIB Daleh Long Pelutan Baram ( RM7, 000), Sidang Injil Borneo Long Puah Ulu Tinjar (RM5, 000), Kelab Lumba Rekreasyen Keliman (RM10, 000), Serakup Kedayan Miri (RM5, 000), Komiti Orang Tuai Miri (RM3, 000), PIBG Long Wat (RM5, 000) PIBG SK Morek baram (RM10, 000), Malaysia Evangelical Collage ( RM50, 000), Sarawak Backbenchers Club ( RM5, 000), BEM Ferry Point (RM10, 000) Serakup Ex- Polis Malaysia ( RM7, 000), JKKK Long Nuah Tinjar (RM3, 000), JKKK Long Pelutan Julan (RM5, 000) Komiti Pemansang Kandang Menua Ulu Tinjar (UTAD)(RM10, 000) PIBG SK Long Palai (RM15, 000) PIBG SK Long Apu Baram (RM5, 000) PIBG Long Anap (RM5, 000) PIBG SRK Aton Baram (RM7, 000) enggau JKKK Long Nen Layun (RM15, 000).