Tanah tusur ba Rh Mandau, Skart 2 patut diputar enggau lengkas
MIRI: Peranak lapan pintu Rumah Mandau, Skart 2, Suai semak Niah berasai nangi belama ketegal tanah ba ujung bilik sida majak tusur.
Rumah panjai diuan 32 iku peranak nya kira 73 kilometer penyauh ari mengeri Miri.
Penusah ke benung ditapi sida tu udah diabas raban Dayak Think-Tank Group (DTTG) Pampang Miri, empai lama.
Siku ari raban komiti, Embam Insol madah, peranak rumah panjai nya suah mai pekara nya ngagai sida ke bekaul tang nyentuk ke diatu empai nerima timbal.
“Sida ditu ninting hari nangi belama lebih agi maya musin ujan.
“Tanah ujung bilik sida majak tusur tang sebana ke dibai ngagai sida bekaul lalu empai dikemana,” pia ku iya nengah penerang media, kemari.
Embam madah, tanah nya ninting hari majak tusur sereta balat ngirauka ati.
“Sekeda ari sida mega madahka diri enda kala tinduk jenak maya malam hari laban nangika penusah enda disadang ngenyit nyadi.
“Tanah tu deka majak tusur enti hari majak ujan,” ku iya madah baru.
Berindik ari nya, DTTG ti nyaup mantaika penusah ke benung ditapi peranak Rumah Mandau nengah media nya ngarapka sida bekaul nyengkaum pengari rayat dia anang laun datai mutarka penusah nya.
“Sebedau penusah bukai nyadi, kitai minta sapa ke patut datai ngesah penusah nya enggau lengkas.
“Diatu tanah nyau majak tusur kelimpah bisi mega ujung bilik nyau udah tekerap,” pia ku iya nerang.