Berita ti madahka peresa perintah PMR ti dipelaba deka dipejalaika taun baru nya berita ti enda betul, ku Ahmad
KUCHING: Pentaksiran Tingkatan 3 (PT3) ti dipejalaika dalam taun 2014 deka terus dipejalaika taun baru, pia ku Kesatuan Guru Bumiputera Sarawak (KGBS).
Presiden KGBS, Ahmad Malie madahka pekara ti madahka peresa perintah Penilaian Menengah Rendah (PMR) dipelaba deka dipejalaika taun baru, nya berita ti enda betul.
“KGBS ngenadaika isu iya nya 2018 taun kepenudi PT3 dipejalaika sereta diganti baru enggau peresa perintah PMR berengkah taun 2019.
“Bepelasarka penerang ti diulih ari KGBS, penerang nya ( PT3 diketuka taun baru) bula.
“Nya alai, KGBS minta raban bansa ngambika enda ngeluarka sebarang penerang bekaul enggau isu pelajar dikena nyeliah sereta meri sebarang penyaru,” ku iya madah ngagai Utusan Borneo, kemari.
Ahmad ti meri penerang nya lebuh ditanya sereta ditukuka sekalika bisi pengamat PT3 taun tu taun ke pendudi pejalaika sereta dipelabaka deka diganti baru ngena PMR.
“KGBS enggai ngasuh raban bansa saru sereta panik enggau penerang ti nadai tanggungpengawa bekaul enggau pelajar,” ku iya.
Ambika chunto ku iya, isu PT3 ti dipelabaka deka diganti baru ngena PMR, udah tentu penerang ti baka nya deka meri penyaru ngagai raban bansa.
“Penerang ti baka nya mega ulih meri anggap ti enda manah ari raban bansa ke lalu ‘nganu’ Opis Menteri Pelajar (KPM) selalu deka ngubah polisi pelajar nitihka peneka politik Menteri Pelajar.
“Nya alai KGBS ngarapka entiti pelajar menua tu enda dikeruga enggau penerang ti ulih ngenataika kurang pengarap ari raban bansa ngagai reputasi sereta sistem pejalar menua kitai,” ku iya.
PT3 sebengkah penilaian dikena nganti PMR ti dipejalaika kenyau ari taun 1993. Lalu (PT3) mungkur silibus ari Form 1 ngagai Form 3 bepelasarka tuju, objektif enggau isi mata pelajar nya.
PT3 bisi empat komponen iya nya Pentaksiran Berasaskan sekolah (PBS); Pentaksiran Aktiviti Jasmani Sukan & Kurikulum ( PASJSK); Pentaksiran Psikometrik ( PPsi) enggau PT3. Lalu format tanya PT3 iya nya subjektif tauka respon tebuka.
KGBS ngenadaika isu iya nya 2018 taun kepenudi PT3 dipejalaika sereta diganti baru enggau peresa perintah PMR berengkah taun 2019. Ahmad Malie Presiden KGBS