NGO di Kapit nerima geran RM8.6 juta ari perintah nengeri
KAPIT: Sapit Kepala Menteri Sarawak Tan Sri Datuk Amar Dr James Jemut Masing ngarika Kepala Menteri Sarawak Datuk Patinggi Abang Johari udah nyuaka chek sepenyampau RM8.6 juta ngagai bala penerima kena lemai Hari Satu, 17 September tu tadi.
Pengawa nyuaka chek diatur beserimbai enggau pengerami makai lemai diatur Serakup Bala Ketuai Komuniti China Kapit ba sebuah restoran ditu.
Penerima chek iya nya SJKC Ming Tat (RM4 juta) belanja dikena mindahka sekula ari Sarikei ngagai Kapit ti diterima chairman iya, Temenggong Tan Kian Hoo, Gerija Methodist Iban Kapit baru (RM3 juta) ti diterima Presiden Konferen Ninting Taun Gerija Iban Methodist Sarawak ba Malaysia, Reverend Steward Damat.
Chairman Joseph Jinggut ngarika SDNU Kapit, tanah pendam baru ba km-8 Jalai Antaroh, RM1 juta ungkup pengawa nasau, nyungkur taba enggau infrastruktur, Chairman Serakup Foochow Kapit, Sii Bang Ee enggau Chairman Serakup Kwang Tung Kapit, Kong Sien Hua ungkup pengawa nasau, nyungkur palan enggau infrastruktur pendam baru ba KM-8 Jalai Antaroh (bela nerima RM500,000), SJKC Hock lam nerima RM500,000 dikena ngaga tiga ringkat blok semin 14 kelas baru sereta SJKC Hin Hua, Song nerima RM100,000.
Kaban Parlimen (MP) Kapit Datuk Alexander Nanta Linggi ba jaku dipansutka iya madahka penyampau semua chek tu manggai RM8.6 juta.
Iya madahka chek tu asil ari pejalai ‘walkabout’ Kepala Menteri Datuk Patinggi Abang Johari ngagai Kapit dulu ari tu, lalu chek datai ari Opis Kepala Menteri ari perintah nengeri.
Nanta madahka bala gempung udah dulu nganjung peminta maya Kepala Menteri nemuai Kapit. Tu bantu perintah nengeri.
Sama bisi datai ngemata pengawa nyuaka chek iya nya MP Kapit Datuk Alexander Nanta Linggi, MP Hulu Rajang Datuk Wilson Ugak Kumbong, MP Kanowit Datuk Aaron Dagang, ADUN Bukit Goram Jefferson Jamit Unyat, ADUN Pelagus Wilson Nyabong Ijang, Sekretari Politik Kepala Menteri Sarawak – Maurice Giri, Tapah Ata enggau Nicholas Kudi Jantai, Residen Kapit Joseph Belayong, Sapit Residen Kapit Galong Luang, Tuai Opis Kunsil Kapit Philimon Nuing, Pemesai Pelilih Kapit Elvis Didit, Pemesai Pelilih Bukit Mabong Douglas Pungga enggau Pemesai Pelilih Jacklyn August, OCPD Kapit DSP Freddy Bian, Pemesai Pampang Khas ASP Chua Su Hua sereta bala bukai.