Gerawat: PBB meseti kering, tegap nyingkang ke mua
MIRI: PBB ti nyadi tulang belakang Gagasan Parti Sarawak ( GPS) meseti nyingkang ke mua ba ubah politik pengudah PRU14 laban parti nya kering meri jalai ba pengawa ditegika ungkup Sarawak jemah.
Madal Presiden PBB, Datu Gerawat Gala madahka politik dudi hari di nengeri tu bepanggai ba PBB enggau GPS gawa ngemanah sereta ngintu pemerat ba peminta peranak Sarawak.
“PBB ngelama tu udah nyata ngayanka pengering enggau penyerakup gawa sereta nangkup peminta rayat dibanding enggau parti politik bukai lalu kitai nyadi perintah kemaya hari ba Sarawak,” ku Gerawat madah nyemetak.
Nitih ku Gerawat, beambika chunto parti lama ba Malaysia baka UMNO ti ditumbuh dalam taun 1957 diatu pambar ngagai UMNO enggau Peribumi, MCA mega pambar nyadi MCA enggau Gerakan, MIC mega pambar nyadi MIC enggau PPP.
Ku iya, semina PBB aja enda pambar tang majak kering laban rayat nemu parti tu gawa enggau nangkup peminta Sarawak enggau peranak menua.
Nyentuk ke sehari tu, PBB tegap enggau beserakup lalu udah nyata dipeda maya PRU14 ke alai udah menang 18 penuduk ba renggat perintah besai, Perintah Besai PH udah diaku pengering sida.
Ku iya, peranak Sarawak agi meri sukung nadai bebagi ngagai PBB laban sida komited gawa negika rayat sereta udah nyata mai mayuh pemansang enggau ubah ba rampa menua Bumi Kenyalang.
Iya madahka bala kaban PBB enggau GPS patut anang irauka ubah politik ke alai juluk Kepala Menteri Sarawak meri fokus enggau netap deka mai mayuh agi pemansang ngagai rayat.
Ku iya, pekara pemadu beguna bala kaban PBB meseti kering sereta sedarka gimik politik enggau main ari raban penyakal ngemai isu ti sida empu enda nemu baka ni chara ngatur enggau mutar.
Beambika chunto, Gerawat ti mega Sapit Speaker DUN Sarawak madah, beberapa bulan ke udah, mayuh semaya digaga Perintah Besai Pakatan Harapan (PH) enda dikeamat nyengkaum tol enggau royalti 20 peratus minyak ungkup Sarawak enggau peminta rayat.
Iya beratika perintah besai PH agi rapas pejalai lalu perin- tah bedau entu tegap.
Iya nyemetak madah baka ni pengawa sida kandang beberapa bulan pengudah bepilih bulan Mei ari mayuh semaya enggau lalau, bala kaban PBB enggau GPS kitai meda gaya politik enggau agenda sida seminda deka menang aja tang enda nangkup peminta rayat nyengkaum Tun Mahathir.
“Pekara diperatika aku, semaya begunaka timpuh lama tang Perintah Besai PH kelalu berumban deka ngamatka iya,” ku iya nambah.
Ngenang pasal GPS, ku iya, pengudah dikemendarka ROS, parti nya deka ngatur pejalai matau menua ngagai semua 82 pampang PBB.
Ku iya, Zon 14 ti mungkur Telang Usan, Mulu enggau Marudi, sida deka betemu enggau mending ari Kepala Menteri Sarawak Datuk Patinggi Abang Johari Tun Openg sereta bala ketuai GPS ba peminta enggau pengawa ditegika parti ungkup Sarawak.
Ku iya, ba Baram, sida deka fokus ngagai Ejensi Pemansang Tanah Tinggi enggau Kandang Garis Entara Bansa Asal.
Iya mega ngansak bala kaban PBB ngambika ngadang propaganda penyakal ti semina deka bejai perintah diatu lalu ngasuh rayat saru runding sereta nerangka baru pengawa ditegika parti ti udah lama enggau perintah.