Raban RELA dipinta terus chakah bejalaika tanggungpengawa
SIBU: Raban RELA diansak ngambika terus chakah bejalaika tanggungpengawa taja udah beganti opis menteri ti megai gerempung nya.
Pemesai RELA Bagi Menua Sibu Awis Adenan madah, tu dikena nentuka sida agi ngembuan runding ti endang bebendar nyaga pengelikun.
“Aku ngarapka semua raban RELA agi seruran aktif enda ngira sapa ke megai gempung nya kelebih agi di Sibu.
“Berindik ari tu runding ti seruran nyaga penge- likun patut diteruska laban tu bedau datai ba pengujung agi,” ku iya madah lebuh bejadika Hari Diri Sebilik RELA Penasu / Batu Burak ti digaga ba Kampung Budaya Minio 1 Malaysia ditu, bedau lama.
Sekretari Politik Kaban Kunsil Nengeri ( ADUN) Bawang Assan Wong Soon Koh iya nya Andrew Shilling, Temenggong Stanley Geramong, PemanchaJames Semilan, Penghulu Jeffery Sut sereta pegawai perhubungan RELA Penasu/ Batu Burak Winston Suji entara ke bisi datai ngulu pengeram nya.
Awis mega ngelalau kaban RELA ngambika ngaga kaul ti manah enggau bala ketuai di kandang menua nya sereta enggau komuniti.
“Tu ti nyadi penyelai RELA Tanjung Penasu/ Batu Burak,” ku iya madah.
Awis ke mega kala nyadi RELA di Sabah minta sida ke bukai terus meri sukung ngagai Winston Suji ti nyadi pegawai perhubungan di kandang menua nya.
“Nengah meri kerejasama ngagai iya sereta mega ngagai ketuai komuniti nentuka kitai ulih bejalaika servis dalam siti tim,” ku iya madah seraya nambah diatu raban RELA Sibu bisi ngembuan 28,957 iku kaban.
Beserimbai enggau nya, Winston ke mega meri besai terima kasih ngagai Awis ke saup iya dalam numbuhka RELA Tanjung Penasu/ Batu Burak.
Ku iya madah, RELA Tanjung Penasu/ Batu Burak udah ditumbuhka kenyau ari 19 Ogos 2016 enggau pemayuh kaban iya nya 100 iku.
“Diatu semua kaban ti udah berejister udah niki ngagai lebuh 300 iku,” ku iya nambah.