Program komuniti KRT Taman Jalai Sukun ulih ngenegapka penyerakup pupu bansa

SIBU: Program komuniti ti diatur Kejiranan Rukun Tetangga (KRT) genturung pendiau Taman Jalai Sukun ulih ngenegapka agi penyerakup pupu bansa.

Penulung Pemesai Penyerakup Sibu Muhd Zulkefli Nazri nyemetak madahka penyerakup iya nya siti pekara beguna amat laban tu tiang pemun ngambi ulih idup likun enggau lantang.

“Nadai penyerakup, kitai enda deka idup enggau likun sereta lantang, kelebih agi kitai tu idup datai ari pengarap enggau bansa bebida.

“Berindik ari nya, aku berasai chukup lantang laban raban KRT ditu bejalaika inisiatif ngatur Program Komuniti tu ti tau neguhka penyerakup kita,” ku iya.

Iya mansutka jaku tu rambau Program Hari Malaysia enggau Hari Kebangsaan ti diatur ba Dewan Utama Taman Jalai Sukun ditu, apin lama ke udah.

Sama bisi datai Kunsilor Nazatusyima Bujang enggau Chairman KRT Jalai Sukun Philip Kadom Jamba.

Program tu diatur KRT Taman Perumanan Jalai Sukun enggau kerejasama Institusyen Indu Pampang Jalai Sukun.

Berebak enggau nya, iya berasai lantang laban program sehari nya bela nerima sukung ari Tabika Perpaduan.

Ku iya, ari sukung bala nembiak mit ari tabika, penyerakup ulih diterenak ba sida kenyau ari mit.

“Ari chara tu, kitai dudi hari ulih nempa sebuah komuniti ti bebatak asur enggau tegap ari sukut penyerakup iya,” ku iya.

PENYERAKUP PUPU BANSA: Nazri (duduk, lima kanan) begambar ungkup kenang begulai enggau peranak Jalai Sukun ti bisi ngulu program nya.

ARAM DATAI SAMPAL: Anthony (tengah), Siti (dua kiba), Teng (kiba) sereta bala bukai mantaika Program TAOS 2.0 ti diatur kena 22 September tu di Sibu.