KSDS deka ngatur TAOS 2.0 kena 22 September tu di SHC

SIBU: Kelab Sape Dayak Sibu (KSDS) deka ngatur The Art Of Sape (TAOS) 2.0 kena 22 September tu ba Pusat Warisan Sibu (SHC).

Program ti berengkah 10 pagi nyentuk 7 lemai tu diatur begulai KSDS enggau Opis Dagang Temuai Sarawak (STB), Borneo Event Entertainment (BEE) sereta disaup SHC.

Chairman KSDS Anthony Abong madah, TAOS 2.0 sebedau tu digelar Program Mandangka Sape.

“Baka taun sebedau tu, KSDS agi bekenaka rambai jaku ‘With Sape, We Unite’.

“Taun siti tadi TAOS nerima sambut ke manah ari mensia mayuh lalu tu deka nyadika pengeransing ngagai kami nandu program ke sebaka.

“Taja taun tu kami bisi penekul ba belanja tang kami beterima kasih laban disaup STB, BEE enggau SHC,” ku iya madah maya aum media, empai lama.

Sama bela datai maya tu iya nya pengari STB Siti Nabzah, Direkter BEE Justin Teng sereta bala raban KSDS ke bukai.

“Pengawa mandang enggau ‘Busking’ sape deka diatur belabuh ari 5 lemai nyentuk 7 lemai,” ku iya sambil madah maya nya mega deka dipenggal enggau pengawa bejadi sereta nyuaka setipikit enggau meri tepa ngagai sida ke bekaul tauka temuai ke dipebasa ti bisi datai.

Berindik ari nya, mensia mayuh ti rindu meda pengawa nebah sape bela ditesau magang ngulu program ti enda bebayar tu.

Penerang silik tau ditanya ngagai Anthony nengah lumur 013-5650914 tauka meda ba lama KSDS di Facebook.