Penyakah kunteriktor ngagai jalai Long Luping-Ba’ Kelalan ngandalka ati peranak menua nya
MIRI: Peranak Long Luping, Long Semadoh enggau Ba’ Kelalan ngenang pemanah pengawa kunteriktor, Samling Group of Companies ke chakah ngaga jalai batu R3 Long Luping-Ba’ Kelalan, semina jalai nya aja ke nyambung tanah tinggi ngagai Lawas.
Chairman PBB Pampang Ba’ Kelalan, Tadam Arun madahka diatu jalai batu R3 udah manggai 48 peratus lalu pengawa ngelapis jalai manggai 80 peratus tembu ti digaga ari Long Luping ngelawa Ba’ Kelalan.
“Pemisi jalai tu deka ngubah lanskap tanah tinggi ba Ba’ Kelalan enggau Long Luping lalu kitai deka meri terima kasih ngagai kunteriktor Samling Group of Companies ti udah bebendar gawa ngaga jalai ti diguna peranak ditu,” ku Tadam Arun madah ngagai The Borneo Post kemari.
Nitih ku Tadam, tu udah dikemendarka Sapit Kepala Menteri Sarawak Tan Sri James Masing ba taun siti nyin tadi ke alai pengawa ngaga jalai Long Luping udah diberi ngagai Samling.
Ku iya, kunteriktor udah bejalaika pengawa sida lalu kereja benung digaga kenyau ari pun taun nyin tadi nyentuk ke diatu.
Naka ke diatu ku Tad- am, pengudah berandau enggau kunteriktor, nadai surat ngagihka pengawa ari Opis Menteri enggau standard jalai ari Opis Kereja Raya ti ngasuh peranak irau ke alai kunteriktor engka tau ngetuka projek nya setengah jalai.
Ku iya, jalai tu beguna amat ngagai lebih ari 5,000 iku peranak ari Long Luping ngagai Ba’ Kelalan lalu ngarapka perintah nengeri enda deka ngetuka projek nya.
“Kitai berasai lantang meda pengawa dipejalaika raban kunteriktor ti keran nembuka sambung jalai lalu mai pemaik ngagai komuniti ba tanah tinggi ditu,” ku iya madah nyemetak.
Mandangka gambar projek dipejalaika raban kunteriktor, ku Tadam, diatu peranak nyamai mindah ari genturung pendiau sida ke Lawas lalu nadai nangi maya musim pengujan laban jalai deka enggau benung dikemanah.
Ku iya, beberapa gambar kereja ngemanah enggau ngaga jalai benung dipejalai raban kunteriktor ari jalai Long Luping- Ba’ Kelalan udah diambi.
Iya madahka peranak diatu nyamai mindah nengah jalai ngelawa Lawas enggau pasar besemak bejualka asil enggau produk betanam betupi sida.