Ubah Seksyen 6A(2), Seksyen (3)(b) Kanun Tanah Negeri udah dikemendarka dalam DUN kena 12 Julai tu tadi
KUCHING: Sapit Kepala Menteri Datuk Amar Douglas Uggah Embas madah Pemakai Menua (PM) endang udah diaku sepengudah diberi kuasa undang- undang nengah ubah Seksyen 6A(2) enggau Seksyen (3)(b) Kanun Tanah Negeri.
“Rang Undang- Undang Kanun Tanah Negeri udah ngubah ubah Seksyen 6A(2) enggau Sesyen ( 3)( b) ti dikemendarka DUN (Aum Kunsil Nengeri) kena 12 Julai 2018 udah meri kuasa undang-undang ngagai Pemakai Menua, reti nya, PM tu udah diaku.
“Aku enda nemu nama ba runding sida. Ubah Seksyen 6A(2) enggau Seksyen 6A(3)(b) Kanun Tanah Negeri iya nya inisiatif perintah nengeri ngaku kelebih agi PM enggau hak tanah Adat Bansa Asal (NCR),” ku iya lebuh dirandau kemari.
Uggah mansutka jaku nya lebuh dipinta ngelansa antara resolusyen ti dijapai rambau Aum Besai Bansa Dayak (DNC) Hari Satu tu tadi.
Ba aum besai nya, lebih 10 resolusyen dijapai lalu antara nya dekaka perintah nengeri ngaku PM enggau sah tauka sebaka ba adat bansa asal bukai (adat asal) dikena nyamin beempu tanah NCR.
DNC mega madahka perintah nengeri meseti lurus nyendiaka ‘ penyata kewangan’ bekaul enggau semua pemansang tanah NCR sekalika ngena chara ‘jointventure’ (JV) tauka peribit sereta maya timpuh ‘pajakan sementara’ tembu, tanah nya meseti dipulaika baru ngagai orang ti ngempu nya.
Uggah ti mega Menteri Betanam Betupi Moden, Tanah Adat enggau Pemansang Kandang Menua madah ubah Seksyen 6A(2) Kanun Tanah Negeri ngaul tatak domain kandang menua peranak asal (NTD) iya nya dataika 1,000 hektar.
Seraya ubah Seksyen 6A(3(b) ngagihka pengawa ngeluarka pala tanah JV peranak bansa asal ukai belama nya tang mega nadai bayar premium, suwa tauka caj bukai.
Rambau aum pengarang berita pengudah DUN ngemendarka RUU Kanun Tanah Negeri (Ubah) 2018, Uggah mega madahka NTD mungkur PM sereta Pulau Galau enggau pemesai nyentuk 1,000 hektar tauka 2,500 ekar.
“Diatu domain kandang menua peranak asal iya nya ‘tau ngena, tau ngempu’, ukai baka sebedau tu, ‘tau ngena tang enda tau ngempu’.
“Bansa asal ba nengeri tu tau minta nyentuk 1,000 hektar tauka 2,500 ekar dikena ngulihka pala tanah ba NTD,” ku iya.
Seraya Uggah madah perintah nengeri udah numbuhka raban audit ungkup pengawa audit semua projek JV ngaul NCR.
Iya madahka batang tuju numbuhka raban audit nya iya nya matau enggau silik ‘ penyata kewangan’ nyengkaum ungkus projek pemansang tanah NCR chara gawa begulai.
“Raban Audit tu gawa ngaduka audit semua projek JV ngaul tanah adat hak Bumiputera ba Sarawak.
“Sida mega matau semak nyengkaum ungkus bekaul, ungkup pemerat sida ti ngempu tanah,” ku iya.
Sebedau tu lebuh nyimpul jaku rambau DUN Mei 2018, Uggah madahka opis menteri iya bejalaika model baru dikena ngerumban pemansang tanah NCR.
Nitih ku iya, model nya senentang ‘ pajakan tanah’ belalauka suwa ninting bulan ba tetiap satu hektar ti dipesetuju antara pengempu enggau kompeni beranakka puku.
“Ba baruh atur pengawa tu, bayar suwa deka berengkah ari taun keterubah nanam lalu ditampung sepanjai timpuh ‘pajakan’ iya nya 60 taun.
“Model tu nentuka timbalpulai enggau lengkas, konsisten sereta tegap ungkup pengempu tanah,” ku iya.
Uggah madah ‘modul pajakan’ deka nyadi alternatif nembuka Modul JV ti bisi diatu.
Rang Undang-Undang Kanun Tanah Negeri udah ngubah ubah Seksyen 6A(2) enggau Sesyen (3)(b) ti dikemendarka DUN (Aum Kunsil Nengeri) kena 12 Julai 2018 udah meri kuasa undang-undang ngagai Pemakai Menua, reti nya, PM tu udah diaku. Datuk Amar Douglas Uggah Embas Sapit Kepala Menteri