Komuniti Melanau di Sibu meseti meri sukung ti tegap ngagai PMS
SIBU: Sekretari Politik Kepala Menteri Abu Seman Jahwie minta komuniti Melanau di mengeri tu ngambika sama meri sukung ti rat ngagai Gerempung Melanau Sibu (PMS).
Kebuah pia, PMS kelebih agi bala komiti enggau eksko gerempung nya sempama baka orang berani komuniti Melanau ti bebendar ngetanka adat enggau main asal komuniti Melanau di nengeri tu.
“Kitai iya nya orang kuat ari raban polis sereta soldadu ti bebendar ngetanka hak sereta pengelikun menua... Nya nyema dipeda ari sukut ngetanka menua.
“Tang, enti dipeda ari sukut adat enggau main asal, sida tu iya nya kaban komiti enggau eksko ti baka orang berani mega laban bebendar ngetanka adat sereta main asal Melanau.
“Nya alai, aku minta ngagai semua komuniti Melanau di luar din ngambika meri sukung ti penuh ngagai gerempung tu (PMS)...Sukung ukai semina ari sukut mata duit, tang nengah madahka diri seruran meri sukung mega udah umbas,” ku iya.
Iya madah munyi nya lebuh ti bejaku ba Pengerami Makai Lemai Program ‘Pedun Lau Malaysia’ beserimbai enggau Hari Malaysia di laman begunan PS ba Jalai Awang Ramli Amit, malam ensana.
Kelimpah ari nya, Abu Seman mega ngansak PMS ngambika besedia enggau kaban ti patut nganti penuduk sida ke deka nyadi ketuai gerempung nya jemah ila.
Ku iya, pengawa nyadi ketuai iya nya penguji ti besai laban nengah pengawa nya ti deka nentuka gerempung nya mansang ke mua lalu mujur nempuh semua penguji ti ditapi.
“Penyampau kitai nyangka enda mayuh ari bansa bukai, tang nyema kitai beserakup sereta bisi ketuai ti manah, udah tentu nadai siti pan penguji ulih nanggul kitai,” ku iya.
Beserimbai enggau nya, pengerami makai lemai nya udah dirichahka enggau pekit PMS Idol sereta Pekit ‘Poco-poco’.
Ahmadi Safuan udah menggi gelar champion PMS Idol, lalu Salwa Saini enggau Mohd Firdaus Abu Bakar ba penuduk lumur dua enggau lumur tiga.
Ba peikit ‘Poco-poco’ gelar champion diempu tim Lujik Keling, lalu tim Jipo Jipo ba penuduk lumur dua sereta Mama Gojes enggau The Hot Mama ba penuduk lumur tiga enggau lumur empat.
Pemenang PMS Idol udah mai pulai mata duit, setipikit enggau trofi, lalu pemenang pekit ‘Poco-poco’ udah mai pulai mata duit, setipikit enggau hamper.