Serian ngerikod 93 kes nembiak betubuh bisi ba taun 2017, ku John
KUCHING: Sepenyampau 93 kes nembiak betubuh bisi udah dirikod ba Serian dalam taun nyin tadi lalu tu siti pekara ti serius ke diperati perintah nengeri ngambi ulih diputar, ku Kaban Kunsil Nengeri (ADUN) Bukit Semuja, John Ilus.
Ku iya nambah, bemacham pengawa udah dipejalai raban Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit nengah ejensi bejalaika pengawa Kaunsil Pemansang Rama Sarawak ditu.
“Ba taun 2017, Serian ngerikod sepenyampau 93 kes nembiak betubuh bisi seraya dalam bulan Januari nyentuk Jun taun tu, bisi sepenyampau 44 kes nembiak betubuh bisi ditu.
“Sepenyampau 53 iku ari 93 kes nembiak betubuh bisi iya nya sida ti bedau belaki,” ku iya lebuh bejadika Majlis Penutupan Jerayawara OneStop Teenage Pregnancy Commmittee ( OSTPC) enggau Undang-undang Sosial 2018 di Serian apin lama ke udah.
Nya alai bemacham pengawa udah dipejalai dikena mutarka penanggul nya nengah beberapa program meri penyedar, advokasyen enggau pengawa nagang ti begulai enggau gempung strategik opis menteri.
Kaunsil Pemansang Rama Sarawak mega udah bejalaika Program Kesedaran enggau Advokasi Pendidikan Seksual (KAPS) ba SMK Balai Ringin, Serian taun nyin tadi lalu bulan April tu tadi ba SMK Serian.
Ku iya, statistik ari Opis Pengerai Sarawak nunjukka dalam taun 2017, sepenyampau 2,130 kes nembiak betubuh bisi udah dirikod ba nengeri tu.
Taja pia penyampau nya nunjukka bisi nurun sepenyampau 14.1 peratus iya nya sama enggau 351 kes dibida taun 2016 ti ngerikod sepenyampau 2,481 kes.
Seraya ba taun 2017, semilan buah bagi menua ba Sarawak udah nyapai KPI nurun penyampau kes dibida taun sebedau nya.
Taja pia, bisi tiga bagi menua ba Sarawak ti agi ngerikod niki tauka nadai berubah iya nya Sri Aman, Sibu enggau Limbang.
Ba Bagi Menua Sri Aman penyampau kes udah niki 56.7 peratus enggau Limbang 17.3 peratus iya nya 13 kes dibida taun sebedau nya, seraya Sibu nadai berubah kes, ku iya nambah.
Berebak enggau nya, iya nerang nengah OSTPC penanggul nembiak betubuh bisi baka isu undangundang, pengerai, rama, pengelikun, pelajar, wang, pengelantang, status tikah, dokumen pengelala diri ulih diputar meruan agi.
Perintah mega udah ngaga ubah enggau nngemanahka undang-undang rama Akta Kanak-kanak 2001 (Akta 611) laban kes ke enda manah ti ngaul pengilap apai indai, pedofilia, penyalah seksual majak nambah.
Akta Keganasan Rumahtangga (pindaan) 2017 tuju nya dikena ngintu sida kelimpah mantu mulaika pemanah ruang bilik.
“Ubah nya mega ngaul Perintah Perlindungan Kecemasan (EPO) iya nya orang indu tau dilindung dalam timpuh 24 jam ba Opis Pengintu Pengelantang Pendiau Mensia Mayuh.
“Dalam Akta Kanakkanak ( pindaan) 2016 (A1511) bisi empat pekara besai dipasuk iya nya rejister nembiak mit, perintah servis komuniti ( CSO), pengawa nyaga belalauka ruang bilik enggau neritka ukum.
“Akta Kanak- kanak ( pindaan) 2016 diatu nyauka ngaum semua enggau mungkur bemacham pekara ngelindung, ngintu, mulaika pemanah, ngerembai enggau nyereta,” ku iya.
Sama bisi datai Sekretari Eksekutif Kaunsil Pemansang Rama Sarawak, Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit ngarika Direktor Opis Pengintu Pengelantang Pendiau Mensia Mayuh Sarawak, Umadi Polot, Residen Bagi Menua Serian, Jonathan Lugoh enggau Sapit Residen Serian, Mastapa Julaihi.