Ulah enggau jaku iya nya chukup nadai pematut nyema pan iya enda kiruhka MA63, laban iya empu nyadi luyar, ku Ting
MIRI: SUPP tekenyit sereta asa amat senentang penerang ari ex-menteri perintah besai ari UMNO Datuk Seri Mohd Nazri Abdul Aziz, ti minta Sabah enggau Sarawak ngelepaska hak imigresyen menua nya ngambika diaku nyadi kaban kunsi ti sama ba Federesyen Malaysia.
Sekretari SUPP, Datuk Sebastian Ting madahka pengawa nya pemadu nadai ‘etika’ sereta nadai pematut enti sema iya enda kiruhka Sempekat Malaysia 1963 (MA63) laban iya empu nyadi luyar.
“Sekalika iya (Nazri) ngaga diri enda nemu tauka ngaga diri beli tauka enda ibuhka asai ati sereta pengarap peranak Sarawak enggau Sabah, Malaysia Timur.
Chara iya bejaku lalu tu ukai keterubah, nadai berundingka empas jaku enggau asai ati peranak Malaysia bukai di Sarawak enggau Sabah,” ku Ting nengah penerang iya kemari.
Ting ti mega Kaban Kunsil Nengeri ( ADUN) Piasau madah, sekali tu peranak Sarawak enggau Sabah meseti bediri teguh begulai lalu ngelaban Nazri begulasi enggau kaban politik bukai ari Semenanjung Malaysia ti sebaka penemu.
Ting pechaya tebal agi rayat ba Semenanjung Malaysia enda nemu sejarah enggau pekara nyata baka ni Malaysia ditumbuh kena 16 September 1963 enggau pengawa nyain MA63, seraya nambah, kitai enda nyalahka sida laban tu salah Opis Menteri Pelajar.
“Bup sejarah seruran madahka Sarawak enggau Sabah begempung enggau Malaysia. Sarawak enggau Sabah num- buhka Malaysia, ukai nyereta Malaysia.”
“Nya alai, Opis Menteri diansak ngambi ngerah bala pemesai pelajar opis nya ngubah Bup Sejarah ke bisi diatu enggau pekara sereta sejarah ti betul senentang pengawa numbuhka Malaysia, ngam- bika ukai semina rebak kitai ke diatu baka Nazri aja, tang rebak dudi kitai deka belajar enggau nemu pekara baka ni Malaysia tu ada.
“Ba timpuh panjai, tu tentu deka manah ke menua kitai ba pengawa nerenakka pengelikun enggau pengelantang,” ku iya.
Ting nyemetak madah lebuh berandau numbuhka Malaysia, siti ari pekara ke pemadu besai dijaga ungkup Sabah enggau Sarawak iya nya Autonomi Imigresyen ngagai kededua menua tu. Pekara tu nyata dipadah dalam MA63. Sarawak enggau Sabah nyain MA63 ti beguna amat tu nyadi menua, ukai nengeri.
Kebuah bala ketuai ari Sarawak enggau Sabah deka nyaga peranak ari kededua menua tu ari ditama orang ti enda dikingin ari Nengeri Fe- deresyen Malaya, kelebih agi raban ekstremis, ekstremis ba jalai pengarap enggau sida ti seruran mejah pemintar peranak Sarawak enggau Sabah, nyengkaum enggau niat deka nerenak pemambar enggau ati begedika pangan diri entara peranak Sarawak enggau Sabah. Sida tu endang enda diterima tama ngagai Sarawak.
Ku Ting nambah, ngelama tu Sarawak agi chukup lantang lalu peranak menua tu diau likun enggau lantang, laban sida deka idup dalam beserakup, likun enggau dalam pengelantang. Siti ari kebuah neritka Autonomi Imigrasyen enggau intu kitai.
“Patut enda kitai diatu dipejal ngelepaska Autonomi Imigrasyen kitai, semina ketegal Nazri ngasuh baka nya?” ku Ting nanya.
Pemintar runding Nazri tau nyadi tanda tanya ti nyadi menteri kanan ngelama tu, deka berasai malu mansutka penemu mapap ke baka nya pengudah menua baru udah ngerami Hari Malaysia.
Ku Ting nambah, niang Kepala Menteri Datuk Patinggi Tan Sri Adenan Satem ngasuh rayat berasai sinu nengah pengeran iya negika Autonomi Sarawak lalu peranak Sarawak nadai kala bediri begulai sebedau tu, tegap enggau dalam penyerakup, ngundi 72 iku ADUN BN ari 82 penuduk nengeri maya Pengawa Bepilih Kunsil Nengeri Sarawak 2016.
“Sarawak meseti seruran dulu agi dikemerat lalu udah datai ba maya iya kitai peranak Sarawak ngingatka diri empu ke alai kitai meseti beserakup ba pejalai negika hak Sarawak,” ku iya.
Sekalika iya (Nazri) ngaga diri enda nemu tauka ngaga diri beli tauka enda ibuhka asai ati sereta pengarap peranak Sarawak enggau Sabah, Malaysia Timur. Datuk Sebastian Ting Sekretari SUPP