Raban pengari MOU ngulu Kongres Ai Dunya enggau Pemandang 2018 di Tokyo
TOKYO: Menteri Bekal Ai enggau Elekterik Menua Pesisir Dato Sri Dr Stephen Rundi Utom ngulukaka 13 kaban pengari ngagai Kongres Ai Dunya enggau Pemandang 2018 di Tokyo berengkah ari 16 nyentuk 21 September tu.
Raban nya datai ari Menteri Muda Bekal Ai Datuk Liwan Lagang, Sekretari Mendam Dato Ir Alice Jawan Empaling, enggau bala pengari ari Opis Menteri Bekal Ai enggau Elekterik Menua Pesisir, Opis Bekal Ai Menua Pesisir, Kaunsil Ai Kuching, Kaunsil Ai Sibu sereta LAKU Management Sdn Bhd.
Kongres Ai Dunya enggau Pemandang 2018 nya pengawa dua taun sekali ke diatur International Water Association (IWA) ti ngempuru lebih ari 5500 raban profesional ai, rampa menua enggau pekara bekaul ari lebih 100 menua ngambika mantai enggau bejuraika pekara bekaul enggau pengawa ngintu ai.
Pengawa dunya tu mungkur semua pusin ai ungkup raban profesional ba pekara ai.
Rambai jaku kongres taun tu iya nya ‘ Shaping Our Water Future’enggau 187 sesi, 88 sesi teknikal, 52 ,9 jaku pemuka enggau 6 forum bala ketuai ti mungkur topik senentang sains pemungkal, inovasyen teknologikal sereta ngemeranka pengawa nyadi ketuai ari serata dunya dikena nempa transformasyen ba pengawa ngintu ai chara global.
Bala pengari diberi pengawa belajar enggau mai pulai juluk, teknologi sereta ngemeranka pengawa kew pemadu manah ti baru, ulih dikena ba industri bekal ai ba nengeri ungkup pengawa ngemanahka bekal ai di Sarawak.