Mayuh isu udah dikerandau 16 NGO enggau MP Sarawak
KUCHING: Sepenyampau 16 Gerempung Ukai Dikuasa Perintah (NGO) ari mayuh macham penatai begempuru sereta berandau enggau bala kaban parlimen (MP) Sarawak apin lama ke udah.
Topik ti dikerandau nyengkaum pekara pelajar, demokrasi, pengerai, hak mensia enggau pengawa ngemaruka institusyen ngagai rampa menua, peranak asal, hak tanah sereta mayuh agi ke bukai.
“Batang tuju randau ti diatur Bersih Sarawak tu dikena nempa siti pelasar ungkup gerempung komuniti sivil ti meri kelala ngagai bidang kereja, isu ti ditapi sereta agenda pengawa ngemaru sida enggau bala MP.
“Randau tu diatur dalam semengat demokrasi sereta ngaul input gerempung ari renggat baruh baka NGO ngagai raban ti ngaga pemutus baka bala MP ti datai ari pengari rayat. Nya mega ngemendarka kitai nyadi sebagi ari proses pengawa nempa menua dalam Malaysia baru,” ku Chairman Pengatur Randau, Ann Teo ba penerang berita iya kemari.
Bala MP ti bisi datai ba ngulu randau nya, Menteri Kereja Raya ke mega MP Selangau, Baru Bian; MP Bandar Kuching, Dr. Kelvin Yii enggau MP Miri, Dr. Michael Teo Yu Keng.
Taja pia, bala MP bukai nengeri tu ti dikangau enda datai ngulu randau nya ketegal bisi komitmen bukai.
Ba randau nya, tetiap NGO mantaika isu, agenda enggau peminta sida ungkup
pengawa ngemaru ba sitak sida empu di nengeri tu.
Antara raban ditagit tauka juluk sida iya nya raban ti seranta, orang indu enggau nembiak mit ti patut dijaga, raban ti dikelaung, sida ti idup enggau HIV (ODHA), dichiping sereta peranak Sarawak.
Berebak enggau nya pekara bukai ti bisi dibantai raban NGO iya nya, ngemaruka pengawa bepilih nyengkaum peminta ngerejista pengundi nengah chara automatik.
Tu nyadi chara dikena mutarka urung 500,000 iku ti patut tang bedau berejista ba Sarawak sebedau Pengawa Pepilih Nengeri (PRN) Sarawak ti deka datai enggau literasi politik sereta pansik sivik ba sekula.
Kelimpah ari nya ngelala seksualiti enggau pelajar penempa diri ti engkeman enggau renggat umur ba sekula mega bisi dipejurai dalam randau nya.
“Nya kebuah kitai ngarapka bala MP tu deka mantaika pengirau besai kitai tu ngagai opis menteri tauka ejensi bekaul lalu kitai pechaya sida deka seruran berandauka pengirau ati enggau pengawa ngemaruka NGO tu,” ku Ann.