Status ti sama endang udah lama dianti peranak Sabah enggau Sarawak baka ti dalam Sempekat Malaysia 1963 (MA63)
SIBU: Menteri Besai nyamin Malaysia Baru dipegai perintah Pakatan Harapan (PH) deka mulaika status ti sama ngagai Sabah enggau Sarawak baka ti dalam Sempekat Malaysia 1963 ( MA63) ti nyadi sejarah nyata.
Muji pekara tu, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah ngumbai tu pengawa ti manah nuju Malaysia ti lantang enggau besai agi.
“Tentu nya pekara disebut tu endang udah dianti lama semua peranak Sabah enggau Sarawak.
“Nyau pengujung, Putrajaya udah nerima pekara nyata ke alai Sabah enggau Sarawak tu menua ti numbuhka Malaysia lalu ukai semina nengeri, baka nengeri bukai ba Semenanjung Malaysia.
Tentu nya pekara disebut tu endang udah dianti lama semua peranak Sabah enggau Sarawak. Datuk Abdul Karim Rahman Hamzah Menteri Dagang Temuai, Seni, Main Asal, Nembiak enggau Lumba
“Siti pengawa ti manah nuju Malaysia besai agi enggau lantang,” ku Kaban Kunsil Nengeri (ADUN) Asajaya madah ngagai The Borneo Post kemari.
Abdul Karim nimbal jaku dipansutka Tun Dr Mahathir Mohamad ba Kota Kinabalu kena Hari Minggu ty tadi ke alai Malaysia Baru dipegai perintah PH deka mulaika status sebela ngagai Sabah enggau Sarawak baka ti udah disempekat dalam MA63 lebuh Malaysia ditumbuh 55 taun ke udah.
Mahathir udah nyebut, status Sabah enggau Sarawak, ti diubah ari bakih sebela (enggau Malaya) ngagai nengeri dalam federasyen (Malaysia), deka tikal pulai ngagai penuduk asal pengudah pengawa nyerenih MA63 tembu dipejalai.
Menteri Besai bisi nyebut pengawa mulaika status Sabah enggau Sarawak nyadika MA63 pemun ti tegap dikena ngeneguhka kaul antara tiga menua (Semenanjung Malaysia, Sabah enggau Sarawak).
Bejaku rambau pengawa ngintu Hari Malaysia 2018 renggat nasional din, Mahathir udah nyebut pengawa nyerenih MA63 tentu mega bisi pematut bejalaika pengawa nyerenih baru beberapa pekara dikemeran ti udah dipejalai sebedau tu.