Yayasan Brooke, Swinburne nyain LoA nyediaka ‘dermasiswa’ ungkup nembiak sekula Malaysia
KUCHING: Yayasan Brooke nyendiaka ‘dermasiswa’ pelajar ngagai bala nembiak sekula Malaysia ti nampung pelajar sida ba renggat Sarjana Kesenian (TESOL) di Swinburne University of Technology Kampus Sarawak pengudah Surat Sempekat (LoA) disain antara kededua raban ditu, kemari.
Jason Desmond Anthony Brooke nyain LoA nya ngarika raban Yayasan Brooke ti nyadi direktor iya seraya Timbalan Naib Canselor ti nyadi Ketuai Pemesai Eksekutif (CEO) Profesor John Wilson ngarika Swinburne.
Nitih ku Wilson, sempekat pengelama tiga taun nya berengkah ari taun 2019, nyendiaka ‘dermasiswa’ penyampau 50 peratus bayar belajar program Sarjana MA (TESOL) enggau abis nadai dua iku nembiak dalam timpuh setaun nerima pemeri nya.
Ku iya, ‘dermasiswa’ nya diberi ngagai semua peranak Malaysia, kelebih agi ari Sarawak ti patut lalu nyapai 3.33 CGPA baka ditetapka Yayasan Brooke enggau Swinburne.
“Peminta ngagai pengajar Jaku English (BI) di Malaysia enggau wilayah Asian jampat nambah dikena nangkup peminta peranak sida nguasa BI ti deka seruran nyadi batang jaku dagang sereta dagang servis enggau barang antarabansa.
“Terima kasih ngagai Yayasan Brooke laban udah jauh perening ke mua enggau beranakka puku ba pengawa meri biasiswa ke udah ditemu meri pemaik ngagai peranak Sarawak ngambika terus ngerembaika pengelandik sida ba BI,” ku iya.
Ba lansa bukai, Jason Brooke ti sama bejaku rambau pengawa nya madahka Yayasan Brooke lantang ati laban ulih meri sukung ngagai juluk universiti enggau perintah nengeri Sarawak ngenegapka agi pengawa bekenaka BI ba nengeri tu.
“Kitai pechayaka pelajar ulih ngenegap enggau meri penegap ngagai orang. Pelajar mega nambahka pengelandik interpersonal enggau nambahka pengandal orang nya,” ku iya.
Program Sarjana (TESOL) ti disediaka Swimburne Sarawak dilangkar ungkup pengajar BI ti deka ngenegapka penau sida enggau degree bisi kualiti tinggi sereta sida ti megai degree merambu ngubah kereja nyadi pengajar.
Program tu ditusun ngambika nadai penanggul ari renggat pemun ngagai pra-PhD, lalu timpuh belajar pengelama empat semester.
Semanjai empat semester, sida ti belajar dibai ngagai pengawa bejurai dalam kelas, projek ngatika diri enggau beraban, pangku pengawa ngajar (kelas) mit, peneleba ngajar chara terus, ngemansangka perambu pelajar enggau kus reka bentuk enggau mutarka penanggul senentang pengawa ngajar BI.
Kelayakan graduan sijil datai ari satu semester mega bisi disedia ngagai sida ti bisi ati belajar.
Sida ti bisi ati minta ‘dermasiswa’ Yayasan Brooke tau nganjung peminta sida nengah Swimburne of Technology Kampus Sarawak.
Penerang silik mega tau diambi ari ngelawa website www. swinburne. edu. my/ study-options/scholarships. php .