224 nembiak di DUN Kakus nerima baucher uniform sekula ari Yayasan Sarawak
TATAU: 224 iku nembiak sekula ari 14 buah sekula primari enggau sebuah sekula sekondari di pelilih Tatau ba Kunsil Nengeri (DUN) Kakus nerima baucher uniform sekula sepenyampau RM44,800 ari Yayasan Sarawak ba Balai Lumba enggau Main Tatau kemari.
Baucher nya udah disuaka Menteri Muda di Opis Kepala Menteri ( Undang- undang enggau Adat Bumiputera) ke mega ADUN Kakus Datuk John Sikie Tayai.
Ketuai Penulung Direktor ( Skularship) Yayasan Sarawak Zamahari Zaidi madah, taun tu bisi RM4 juta baucher udah diagihka ngagai 20,000 nembiak sekula di selmapur Sarawak enggau tetiap nembiak siku nembiak nerima baucher RM200 enti dibanding enggau sebedau tu semina RM100 aja siku.
“Lis nama nembiak sekula ti patut nerima baucher nya udah diambi ari lis e-kasih Opis Pelajar Pelilih Tatau, Opis Pelillih Tatau sereta Opis Residen Bagi Menua Bintulu.
“Nengah meri baucher tu dikearap nya deka ulih ngelempungka tating apai indai meli uniform sekula anak sida,” ku iya ba jaku pengelalu di Pengerami Nyuaka Program Bantu Pelajar Yayasan Sarawak ungkup DUN Kakus kemari.
Ku iya, baucher nya ulih dikena nyentukka pengujung bulan November taun tu lalu apai indai ulih milih sebarang kedai dikena meli uniform sekula anak sida nitihka lis ti udah dipadahka dalam baucher nya.
Program meri baucher nya, ku iya, endang inisiatif perintah nengeri dikena mantu rayat ti kurang penatai pemisi dikena sida neruska pelajar.
“Apai indai ti bisi anak ke ulih nyambung pelajar ke universiti dalam nengeri deka diberi bantu tumu RM1,000 lalu ungkup universiti di Semenanjung Malaysia nerima bantu tumu RM1,500 sebedau duit jali tauka skularship ti nangkan ke nya diteruska,” ku iya.
Iya meri besai terima kasih ngagai Joh Sikie ke udah bejadika pengerami nya sereta bantu ari ejensi bukai ngemujurka program nya.
Ba pengerami nya mega bisi pengawa nyuaka replika chek ngagai Penulung Pemesai Pelajar Pelilih Tatau Muhd Nur Abdullah @ Tana kelai simbolik nyuaka baucher nya.
Sama bisi datai Pemesai Pelilih Tatau Barayan Lenya, Saifulbahry Alwie ke nyadi pengari Residen Bagi Menua Bintulu, pengajar, ketuai komuniti sereta nembiak sekula.