Peranak lima pintu di Kpg Tuba enda puas ati ketegal suah dichiping tuai rumah

KUCHING: Enda tan ati ketegal seruran dikelaung tuai rumah, dia lima pintu di Kampung Tuba, Simunjan mutus mindah ari menua asal ngentak langkau kediri.

Diarika Asing Sigan, 74 taun, iya madah, sida lima pintu sepengudah ke angkat ari menua lama kala nampung dua buah rumah panjai ke bukai tang mengkang nerima nasit ke sama sebedau megai diri baka ke diatu.

“Kami enda tan agi baka bala peranak rumah panjai bukai ke dipegai ketuai ti bechiping.

“Ari projek baka skim betanam betupi nyentuk ke pemeri ari opis enggau pengari perintah ngagai Komiti Pengelikun enggau Pemansang Genturung Pendiau (JKKK), nadai kala nyengala dibagi tauka dikena manah ungkup rumah panjai,” pia ku iya mantaika sebana, kemari.

Asing madah, ambika banding baka sum padi tauka bantu bukai, sida serumah (semua ba tiga buah rumah panjai) mega enda disengkaum magang, bisi dibai lalu bisi ditinggal ngisi pom skim.

“Aku ti ngarika kami lima pintu tu ukai reti deka ngelaban sida ke nyadi tuai rumah tang nyau enda tan agi digaga baka nya.

“Nadai chara bukai, ngarapka udah tu kami ti baru ngentak kediri (taun tu) tau bulih skim bantu ti patut ari opis perintah,” ku iya madah baru.

Iya mega madahka sida lima pintu diatu agi beensarau kelimpah nadai karan tauka nadai bekal ai beresi.

“Kami mega minta kasih bala ketuai komuniti baka sida kaunsil, penghulu, pemancha enggau pengari rayat ngambika pengawa nyiri tuai rumah deka meri basa ngagai nembiak redak laban sida ti ngempu kuasa milih tuai rumah ti diasaika patut nyadi ketuai megai sida.

“Enti nunda tuai rumah dipilih tauka diundi rayat lalu ukai pilih orang bukai,” ku Asing nandu.