Sarawak enggau numbuhka menua Malaysia, ku Riot
SERIAN: Sarawak enda nyereta Malaysia tang udah numbuhka Malaysia begulai enggau Sabah enggau Semenanjung Malaysia.
Kaban Parlimen ( MP) Serian, Datuk Seri Richard Riot Jaem madahka raban ti ngumbai Sarawak nyereta Malaysia nya silap.
“Anang sesekali bisi runding kitai nyereta Malaysia, enda.
“Sarawak nadai kala nyereta Malaysia. Sarawak begulai enggau Borneo Utara iya nya Sabah, Singapura enggau Semenanjung Malaysia nempa sebuah menua baru iya nya Malaysia,” ku iya.
Iya mansutka jaku nya lebuh bejaku bejadika ‘Malaysia Day Ride’ ditu apin lama ke udah.
Riot mega madahka kena 13 September tu tadi, iya begulai enggau bala MP ari Sarawak udah berandau eng- gau Menteri Besai Tun Dr. Mahathir Mohamad lalu ba randau nya minta ngambika hak Sarawak baka ba Sempekat Malaysia 1963 (MA63) dipulaika baru.
“Kitai minta Tun Dr. Mahathir mulaika hak Sarawak baka ba MA63 laban nya diempu kitai.
“Ba randau nya mega, iya setuju ngambika Sarawak enggau Sabah digelar Kandang Menua ukai nengeri,” ku iya.
Ku iya, lebuh besebutka pekara bekaul hak Sarawak, bida ideologi politik, pengarap enggau bansa patut diteju tang negika pengawa nyadi rayat Sarawak ti begempung.
Ba lansa bukai, bisi 250 pengempu motosikal bekuasa tinggi nyeretai ‘ Malaysia Day Ride” ti nyadi antara program diatur palan servis Parlimen Serian beserimbai enggau pengawa ngintu Hari Malaysia.
Program tu meleka ari Stadium Serian ngelawa Tebedu lalu ngetu enda lama ba Tiyap Lanting sebedau mulaika diri ngagai Kampung Pichin ditu.
Ku iya, tuju program tu mega ngempung sida ti ngempu mutosikal bekuasa besai bagi menua Serian.
“Aku enda nyangka timbal ngelui ari diadang. Kitai semina melabaka 50 ngagai 100 iku deka begulai enggau kitai tang 400 iku sida ti direjista, lalu bisi mega sekeda ditulak ketegal enda chukup T-shirt,” ku iya.
Riot madahka iya merambu ngatur gempuru pengempu mutosikal bekuasa besai Bagi Menua Serian kena ujung taun tu lalu antara isi program iya nya konvoi ngagai Balai Kerangan, Indonesia. SIBU: SK St Francis Xavier (M) Kanowit udah ngerami Hari Malaysia kena 14 Sept, nengah pengawa ngatur ngena ngepan ti lalu nyadika penutup pengerami nya.
Bala nembiak udah ngena bemacham ngepan asal pupu bansa, lalu bisi nya ngena ngepan ke digaga ari Jalur Gemilang.
Bejaku ba pengerami nya, Kepala Pengajar Joannes Uno ngelalau nembiak rebak baru sentang pemesai reti bemacham pup bansa ke beida ti nempa menua Malaysia.
Iya mega muji bala staf enggau nembiak ti u dah mujur ngatur pengerami nya.
Mayuh bengkah aktiviti udah diatur dulu berengkahari 12 September.
Nya nyengkaum pekit nyura, projek bup skrap, pekit nyadaka ‘puisi’, kuiz Hari Meredika enggau enggau pekit lagu patriotik.