Sekumbang timpuh matau nya bisi 46 ripot udah diterima sereta 23 jaku tangkan udah dikeluar ngagai pedagang
BINTULU: Opis Menteri Dagang Dalam Menua, Koperasi enggau Orang Bebelika Barang ( KPDHEP) udah bejalaika pengawa meresa 729 kedai selampur Sarawak enggau matau 21,870 barang pengudah Chukai Dagang enggau Servis (SST 2.0) terit dipejalai kena 1 September tu tadi.
Sapit direktor ti lalu nyadi Ketuai Pemesai Penerit Adat KPDNHEP Sarawak, Mohd Nawawi Abdul Rahman madah, nyentuk diatu bisi 46 ripot ti mayuh macham udah diterima lalu 23 jaku tangkan udah dikeluar ngagai pedagang enggau meri tangkan sereta kaunseling ngagai sida bekaul resit enggau tanda rega ti ngasuh saru penemu tang nadai kes ngaul pengawa beambi ulih ngeletakka rega barang tauka servis (catut).
Nya alai ku iya, sida ngarapka timbal ari mensia mayuh enti sema bisi rega niki tauka berasai asa enggau caj rega barang ti enda patut dipinta pedagang dilalau telefon tauka ‘ Whatsapp’ ngagai lumur catut 019-2794317 ngambika atur pengawa ti patut dipejalai, ke alai lumur nya udah dilanchar menteri PDNHEP Datuk Saifuddin Nasution Ismail apinn lama ke udah, nyadi pelasar ngemuntangka pengawa mensia mayuh dikena nentuka KPDNHEP sikar gawa.
“Bisi jalai bukai ngaga ripot iya nya e-aduan tang tu chara umum, tang kitai minta mensia mayuh ngaga ripot nengah jalai ti betul sereta enda entu ngasuh sida ngaga ripot sekalika ketegal asa enggau rega enggau ke bukai enggau mantaika ba media rama ‘Facebook’ sereta laman ‘Twitter’ laban tu ukai jalai ti dikemendar ( sah). “Kitai minta enggau ngelaluka mensia mayuh ngena chara pemadu engkeman ngaga ripot baka ti disediaka kitai,” ku iya bejaku ngagai pengarang berita rambau program bejalai meresa Ops Catut 5.0 beserimbai enggau pengawa bejalaika SST 2.0 di Tai Kwong Supermarket, Times Square Megamall ditu, kemari.
Mohd Nawawi madah, kenyau ari SST diterit kena 1 September tu tadi, semua renggat bekaul udah nurutka atur nya, nadai pekara pedagang beambi ulih ngulihka untung lebih tang kitai udah ngelala sereta deka matau enggau beratika gaya rega tetiap barang ti dijual bala pedagang enti sema bisi rega niki ti enda patut.
“Nya alai, nyadi tanggungpengawa kami ba KPDNHEP matau semua kedai ti dikaul baka makit besai, kedai telekomunikasyen, restoran, dobi, tekstil enggau ke bukai ti mungkur dua segmen iya nya dagang barang enggau servis nitihka tarif enggau enda ngambi untung lebih ba dagang sida.
“Reti iya, sida (pedagang) enda tau beambi ulih ba pengawa bejalaika SST 2.0 enggau nambahka ungkus bukai ngujungka rega barang ti dijual ditiki ba renggat renchit,” ku iya madah nyemetak.
Ku iya, pengawa nyaga SST 2.0 mega dipejalai ba renggat kilang enggau pengimport, ke alai, kepenudi iya, kami deka meda rega ba renggat renchit mega nadai berubah.
“Sekalika maya bejalaika Chukai Barang enggau Servis (GST), sifar GST enggau SST 2.0, kami dekaka semua raban ti bekaul bisi tanggungpengawa enggau ngemeranka dagang ti bisi etika ngambika bela mantu mensia mayuh nampung belanja iduo ti majak niki,” ku iya.
Ku iya, orang bebelika barang sedarka hak diri mega majak ditambah raban sida ba semua segmen nengah pelasar bukai, antara iya ba pengawa ‘ gerakan kepenggunaan’ enggau ‘sahabat pengguna’ kelimpah neritka atur ke alai meri pemerat bisi penyedar raban orang bebelika barang nya empu ngambika ngaga ripot nengah whatsapp tauka e-aduan.
“Berasai lantang pengawa meresa nyentuk sehari tu nadai rega niki ti bisi ditemu kami laban kami udah maduka bala pemesai gawa matau KPI (penunjuk prestasi utama) lima kedai ungkup siku pemesai enggau tetiap kedai abis nadai 30 barang patut dipatau dikena nenetuka semua sitak dibungkur kami deka nyadi penunjuk ngambika nadai ‘pencatutan’ ba renggat renchit,” ku iya.
Sama bisi nyempulang Mohd Nawawi ba pengawa meresa nya Ketuai Penerit Adat KPDNHEP Bintulu, Salihin Den, sapit iya, Rozaini Roskan, Penulung Pemesai Penerit Adat Halimah Salleh, Pengarah Tai Kwong Supermarket Tang Kuok Heng sereta bala pemesai penerit adat KPDNHEP Bintulu.
Bisi jalai bukai ngaga ripot iya nya e-aduan tang tu chara umum, tang kitai minta mensia mayuh ngaga ripot nengah jalai ti betul sereta enda entu ngasuh sida ngaga ripot sekalika ketegal asa enggau rega enggau ke bukai enggau mantaika ba media rama ‘Facebook’ sereta laman ‘ Twitter’ laban tu ukai jalai ti dikemendar (sah). Mohd Nawawi Abdul Rahman Ketuai Pemesai Penerit Adat KPDNHEP Sarawak