Sibu BASE Jump 2018 dirichahka agi enggau pekit ‘The Best Superheroes Costume’
SIBU: Sibu International BASE Jump 2018 deka richah agi enggau pekit ‘The Best Superheroes Costume’ ke diungkup ngagai 34 iku penerejun ti ngambi bagi ba program ninting taun mengeri Sibu nya.
Pekit nya endang diatur dikena ngelai ngintu taun ke sepuluh Sibu International BASE Jump.
Residen Sibu Charles Siaw madah, program terejun nya deka belabuh ari pagila (20 September) nyentuk 23 September ti digulu bala penyereta ari 14 bengkah menua nyengkaum pengari ari Malaysia empu.
“Menua ke ngambi bagi ba program tu iya nya United States, Australia, Belarus, Belgium, Kanada, Estonia, Finland, Peranchis, Jerman, Ireland, New Zealand, Russia enggau United Kingdom.
“Dikena kitai ngelai taun ke sepuluh program tu diatur, serak tu kitai bisi ngatur pekit ‘The Best Superheroes Costume’ ngagai penyereta ti ngungkupka perais mata duit RM1,000, RM750 enggau RM500 ngagai tiga iku pesereta ti pemadu nyulut,” pia ku iya madah maya aum media ditu, kemari.
Sama bela datai maya tu iya nya Presiden Malaysia BASE Association Kapten A. Aziz Ahmad enggau Presiden Australia BASE Association Gary Cunningham.
Taun tu, penyereta ke pemadu biak iya nya Corentin Parmentier ke beumur 24 ari Belgium lalu ke pemadu tuai iya nya Eric Pemberton, 65 ari New Zealand.
Penyereta ke pemadu suah terejun iya nya Gary ari Australia ti ngembuan rikod 3,497 kali terejun.
Serak tu mega, tujuh iku penyereta indu ngambi bagi ari menua Kanada, USA enggau Jerman.
Nambahka jaku iya, ku Charles, program taun tu bela dikemujurka begulai enggau KL Tower Jump ti udah nyaup mantaika 10th Sibu International BASE Jump maya aum media ba KL Tower empai lama.
Awak nya dikena iya mai penyereta taun tu bela ngambi bagi ba KL Tower Jump ti diatur kena 28 September nyentuk 1 Oktober.
Nyaut tanya bekaul enggau penyampau penyereta jauh mimit ari taun suba, ku Aziz, pekara nya nyadi bepun ari penanggul teknikal lalu madahka diri deka mutarka penanggul nya taun dudi.
Ba rikod, sepenyampau 84 iku penyereta ngambi bagi ba Sibu International Base Jump taun 2017 suba.
Lemai kemari mega, bala penyereta dibai ngulu pengawa miring dikena minta berekat ngambika program taun tu bela mujur baka taun ke udah. KUCHING: Gerempung Nembiak Pampang Bukit Semuja, Kelab BUSREC enggau JKKK Kampung Riih Daso, Serian kemari udah ngatur Program Beripai ba Ai Wong ‘Sangan’ ditu.
Nitih ku penerang berita, program nya udah disereta sekeda kaban ari raban Bomba Serian, Raban Nembiak PBB Pampang Bukit SemujaKaban Serakup Raban Nembiak, JKKK Kpg Riih Daso enggau peranak genturung pendiau dia.
Program tu nyadi siti ari aktiviti beserimbai enggau pengawa ngintu Hari Malaysia 2018 enggau Program Bejalai Ngabas Genturung Pendiau ti benung dipejalai Palan Servis DUN Bukit Semuja.
Kelimpah ari belepa, kereja nukar paip lama ti ngelama tu dikena nyambung ai bukit ti meri bekal ai alternatif ungkup peranak dia mega bisi dipejalai.
Sama bisi datai Kaban Kunsil Nengeri (ADUN) Bukit Semuja, John Ilus.