PBH dikearap mansa kandang menua komuniti Orang Ulu di Baram
MIRI: Peranak Baram dekaka Jalai Besai Pan Borneo (PBH) mansa kandang menua komuniti Orang Ulu ba Bagi Menua Baram ti deka ngeyampatka pemansang ekonomi enggau ngangkatka tikas idup ditu.
Ex- Komiti Main Asal Serakup Bansa Orang Ulu (OUNA), Albert Ding madah Orang Ulu dekaka Pan Borneo mansa Bagi Menua Baram ari ke ngerenchah menua Brunei, ti deka ngemandakka jam pejalai tang mega ngemai pemansang enggau infrastruktur ngagai bala komuniti.
“Nyema jalai Pan Borneo mansa Baram, tu manahka komuniti Orang Ulu ti deka mai mayuh agi pemansang ngagai Bagi Menua Baram, ulih berimba mayuh agi tanah enggau pemansang ekonomi sereta mega ngemandakka timpuh pejalai,” ku Albert Ding madah ngagai The Borneo Post kemari.
Iya nimbal penemu Kaban Parlimen (MP) Lawas Datuk Henry Sum Agong ngambi neruska jalai ke diatu ti mansa Brunei, Limbang enggau Lawas.
Nimbal penemu Datuk Henry, ku Albert, peranak Baram enda setuju enggau penemu nya laban sida dekaka jalai nengah Bagi Menua Baram ngambika mayuh agi komuniti Orang Ulu deka teulihka pemaik ari jalai nya.
Iya nyemetak madah sambung jalai Miri ngagai Brunei-Limbang-Lawas enggau Sabah ke diatu udah bisi lalu semina ngintu sambung jalai ke bisi, jauh agi lalu begunaka mayuh pengawa bekaul passport ari opis Imigresyen.
Ku Albert, jalai ke diatu nyambung Miri nengah Brunei-Limbang enggau Lawas endang udah bisi lalu rayat mega ulih betengahka sambung jalai ke diatu ari Sarawak mansa Brunei nyambung ngagai Sabah ti udah bisi ngelama tu.
Ku iya nandu, pekara ti dikedeka komuniti Baram iya nya jalai besai Pan Borneo mansa Bagi Menua Baram, nyambung ngagai LimbangLawas enggau ngelawa Sabah ti deka ngemai mayuh agi pemansang ngagai kandang menua pesisir Baram, Limbang enggau Lawas nyengkaum Ba’ Kelalan.
“YB Datuk, kami semina deka nuan nemu, kami chukup asa enggau timbal penemu ari nuan belalauka perambu ubah ngeluruska jalai Pan Borneo enggau nadai ngerenchah menua Brunei,” ku iya madah silik.
Anang nyakal langgur perambu ti nguingka Pan Borneo ngagai Baram ari ke mansa Brunei, ku iya nambah.
Ba lansa bukai, iya enda ngenggaika jalai besai Pan Borneo mansa Brunei laban endang udah bisi jalai dia diatu, tang ngarapka iya ulih digaga mansang Bagi Menua Baram.