Anak Sarawak dikearap nyereta ‘Sibu International BASE Jump’
SIBU: Menteri Dagang Temuai, Seni, Main Asal enggau Nembiak Datuk Abdul Karim Rahman Hamzah madah, pengawa ngatur program ‘ Sibu International BASE Jump’ udah mujur ngangkatka mengeri Sibu ngagai tikas entarabansa.
Beduduk ari nya, iya ngarap bisi anak Sarawak deka nyereta main ekstrem nya ke diatur ninting taun udah tu ila.
“Sibu BASE Jump mujur bulih publisiti ke besai lalu ngangkatka Sibu ba pangggau entarabansa, lebih agi ba raban peminta main tu.
“Nengah program ke diatur tu, dikearap tau matak pengerindu ba raban anak Sarawak ngambi bagi ba main ekstrem tu,” ku iya.
Kaban Kunsil Nengeri (ADUN) Asajaya nya madah munyi nya lebub dipinta meri timbal bekaul enggau Sibu International BASE Jump ke udah manggai taun kesepuluh iya udah diatur.
Sibu International BASE Jump 2018 diatur bepun 20 ngagai 23 Sept tu, dipasuk 34 pesereta ari 14 buah menua.
Udah nya, sekeda pesereta bisi udah nguji terejun ari Wisma Sanyan bepun pukul 8 pagi ensana.
Tu matak penatai mensia mayuh ke bisi mansa Dataran Bandar Sibu Fasa I, diumba gaya hari chukup manah ngemuntang bala pesereta tejun enggau likun.
Residen Bagi Menua Sibu, Charles Siaw madah, sukut pengelikun endang seruran dikemerat dikena nentuka pengelikun bala pesereta.
“Atur pengelikun tu beguna amat dikena nentuka bala penerejun udah terejun antara 100 ngagai 150 jam sebedau sida terejun ari begunan nya. “Nya kebuah, semua penerejun tu endang sida ke mayuh peneleba laban kitai enda ngemendarka sida ke agi baru terejun ari begunan,” ku iya.
Pesereta deka berengkah terejun bepun 21 nyentuk 23 Sept tu, udah terejun malam hari ditaga diatur kena 21 enggau 22 Sept, nitihka pemanah gaya hari.