PDB setuju raban pengatur YS patut diarika semua bansa di Sarawak
MIRI: Pemansang Dayak Borneo (PDB) ditu nyukung penerang Tukang Wang Gerempung Graduet Dayak Sarawak ( SDGA) Tamoi Janggu ti dekaka kaban pengatur Yayasan Sarawak (YS) bisi diari semua bansa ba Sarawak tu dikena nentuka pengawa ngagih skularship tauka duit jali ti enda bechiping.
Chairman PDB Baba Emperan madah, sida setuju enggau penerang nya lalu deka sama nyaup nyapai juluk nya.
“Kami ukai semina setuju enggau penemu iya (Tamoi), tang mega sama nyaup nyapai juluk nya ungkup pemaik bala anak Dayak jemah ila ngambika ulih nerima bantu ari YS.
“Kami mega minta raban pengatur YS ngambika enda bechiping lebuh ti milih nembiak ke patut nitihka standard ke udah ditetapka laban YS asal nya endang diungkupka mantu nembiak sekula Bumiputera.
“Dikearap enggau sukung ari PDB, raban pengatur YS deka lurus agi lalu diarika semua bansa Bumiputera,” ku iya.
Sama besetuju enggau Baba, Presiden PDB Pampang Betong Lenon Atat ke madah PDB endang bebendar ngetanka hak Dayak lalu dekaka raban pengatur YS mega enda bechiping enggau nembiak Dayak.
“Kitai pechaya, mayuh nembiak Dayak ulih nerima skularship tauka duit jali nya, tang ketegal chara milih ti bechiping udah ngujungka nembiak Dayak tinggal nyambung pelajar ke tikas ti tinggi agi.
“Sampai kemaya pekara tu deka nyadi nyema agi bechiping enggau nembiak ari bansa bukai ti endang patut nerima bantu?,” ku iya.
Pia mega ku Lenon nerang, PDB patut ngansak perintah meri kuota ti nemban ungkup nembiak Dayak ngambika bisi diterima ba palan pelajar tinggi perintah enggau peribit.
“Makin hari makin mayuh nembiak Dayak kitai ti teulihka pemutus peresa ti nyulut ukai semina nerima bantu ari YS, tang sida mega patut diberi awak belajar ba palan pelajar tinggi perintah enggau peribit nitihka pemutus peresa sida,” ku iya.
Beserimbai enggau nya, Sekretari PDB Ernie Jimmy mega dekaka YS ngambi mansutka lis nama nembiak ke udah nerima bantu ari baruh YS ke suba enggau syarat ke patut dikena ngulihka bantu nya.
“Tu dikena nentuka endang bisi nama anak bansa Dayak bisi dalam lis nerima bantu YS nya sebedau tu, lalu mansutka standard tikas pemutus peresa ke patut ngambi ngemu- ntangka bala anak Dayak kitai nganjung peminta nitihka standard nya.
“Dikena nyeliahka pengawa ti bechiping ari sukut ngatur enggau mulih, kitai minta YS ngambika pengawa ti patutsereta mutarka penanggul nya,” ku iya nambah.
Tamoi sebedau tu madahka komposisyen pengatur YS diatu enda mantaika nya ungkup semua bansa di Sarawak.
Ku iya, mayuh ari bansa bukai ngerunding YS iya nya ‘Yayasan Melayu’ laban nengah tusun organisasyen ba ‘web-site’ 23 iku ari 25 iku raban pengatur tetinggi iya nya Melayu, udah nya bansa Dayak enggau China diarika siku pengari.