Dr Teo nyuaka bantu kereban beperesa ‘ultrasound’ ngagai KKIA Tanjong Lubang

MIRI: Ba pengawa mantu ngelengkaska proses beperesa di klinik, Kaban Parlimen Miri Dr Micheal Teo udah meri kereban beperesa ‘ultrasound’ nembiak mit dalam kandung ungkup dikena Klinik Pengerai Indai enggau Anak (KKIA) Tanjong Lubong, ditu kemari.

Bantu meri kereban nya udah disuaka ngagai pengari penerima iya nya Ketuai Seksyen Pemansang Pengerai Ruang Bilik Opis Pengerai Bagi Menua Miri Dr Noor Izni Mohamed Shapie.

“Kitai nerima ripot urung 50 iku indai ti ngandung tetiap hari ti bisi datai beperesa, lalu semina bisi siti aja kereban beperesa ‘ultrasound’ ke bisi dikena ditu.

“Nya alai kitai meri se- buah agi kereban injin nya dikena mantu ngelengkaska proses beperesa,” ku iya madah ngagai media sepengudah pengerami nyuaka kereban injin nya ti berega RM16,000.

Nitih ku Dr Teo, iya sebedau tu mega udah meri sebuah kereban ungkup meresa penyakit kuning ( Jaundis Neonatal) ti berega RM8,690 ungkup klinik nya.

Kelimpah ari kereban injin di klinik nya, iya mega udah meri enam set perengka dikena meresa darah tinggi ungkup dikena ba KK Tudan.

Ku iya, kededua klinik nya begunaka kereban nya dikena bala orang ti sakit ke datai berubat.

Beserimbai enggau nya, Dr Teo mega ngarapka Opis Menteri Pengerai Malaysia (KKM) ulih berunding sereta nyediaka agih belanja dikena ngangkatmanah perengkaguna KKIA Tanjong Lubang nya.

Ku iya, kelimpah patut ngemanah begunan nya, klinik nya mega begunaka kerusi enggau kipas ba palan nganti.

“Klinik tu nerima urung 200 nyentuk 300 iku indai ti ngandung enggau nembiak mit tetiap hari lalu gaya pendiau ba dalam klinik sekut, kelimpah ari kandang ba luar klinik tu bisi panas ketegal ti nadai kipas enggau kerusi.

“Nya mega nyadi entara isu ti deka ktai perati ila ungkup pemaik sida ti datai berubat kitu,” ku iya nambah.