Sarawak, Sabah enggau Semenanjung mesti besaup ngerembaika ekonomi
KUCHING: Sarawak, Sabah enggau Semenanjung Malaysia enda tau enda nempa kerejasama nyadi sebengkah menua dikena ngerembaika ekonomi.
Menteri Dagang Antarabansa enggau Industri, Darell Leiking madahka ketetiga bengkah menua nya ulih mekuh ngagai makit BIMPEAGA (kandang endur pemansang ASEAN Timur - Brunei, Indonesia, Malaysia dan Filipina).
“Nama ke patut dikemeran sereta dikemeratka kitai iya nya Sarawak, Sabah enggau Semenanjung Malaysia enda tau enda nempa kerejasama nyadi sebengkah menua, ke alai kitai ulih ngerembaika ekonomi.
“Penyemak entara menua Filipina, Brunei enggau Menua sereta Sabah enggau Sarawak, nya alai kitai patut mekuh ngagai pasar(market) BIMP-EAGA, awakka kitai ulih mantu nyungkakka agi kandang menua ulu Sarawak enggau Sabah nyadi sebuah ari ekonomi baru.
“Nambahka nya kitai patut nyikap diri ngena blok ekonomi ti baru tauka nempa sistem ekonomi baru entara ASEAN plus BIMP-EAA. Tu peluang mega peluang ke patut dikemekuhka begulai entara perintah Sabah enggau Sarawak sereta perintah besai,” ku iya.
Darell mansutka pekara nya lebuh dikerandau raban pengarang berita, pengudah ke ngabas seraya gawa ngagai kilang Elim Industries Sdn Bhd ba Zon Perindustrian Bebas Sama Jaya ditu, kemari.
Bejaku baru iya madahka perintah besai nempa kerejasama enggau perintah Sarawak sereta Menteri Besai Tun Dr Mahathir Mohamad ti tebuka bekaul enggau pekara nya.
Maya bejaku ba mua mensia mayuh ti sama bisi digulu Sapit Kepala Menteri Datuk Amar Douglas Uggah nyerumba ngintu 16 Septmber Hari Malaysia ke diatur di Sabah, ku Darell, Menteri Besai madahka Persekutuan Malaysia menua kunsi entara Sabah, Sarawak enggau Malaya (Semenanjung Malaysia).
Menteri Besai lebuh ke bejaku madahka ketitiga buah menua dalam Persekutuan Malaysia iya nya kaban seati.
“Kaban seati reti iya kitai ngaga pemutus begulai. Nya alai kitai ngarapka Kepala Menteri Sarawak ( Datuk Patinggi Abang Johari Tun Openg) deka terus nempa kerejasama ti manah enggau Kepala Menteri Sabah ( Datuk Seri Mohd Shafie Apdal) sereta Menteri Besai Malaysia (Tun Dr Mahathir Mohamad),” ku iya.
Kenyau ari Menteri Besai madahka kitai kaban seati ku Darell, reti iya tusah senanag kitai sama ngasaika, kaban mega reti iya kitai patut sama berunding baka nama perambu ti nguntungka bakih kitai di Semenanjung Malaysia mega deka nguntungka Sabh sereta Sarawak.
Tang ku iya, Sabah enggau Sarawak selalu ngasaika diri agi tinggal dibelakang ari menua Semenanjung Malaysia.
Nitihku iya, kebendar Sabah enggau Sarawak nerima belanja pemansang ti pemadu mayuh lalu Sarawak lumur satu.
“Pekara tu dipadahka ngagai aku. Aku mega nemu maya Langgur Pemansang Malaysia Ke-11 dibantaika. Tang utai nya chara fizikal nadai dipeda Sabah enggau Sarawak.
“Besai belanja pemansang diungkupka ngagai kita tang enda dipeda. Bisi pekara ti enda betul , bisi sekeda orang madah ketegal Sarawak enggau Sabah menua ti kelalu besai. Tentu bisi orang diberi kontrak tang enda bejalaika iya, kitai deka nentuka sapa orang nya,” ku iya.
Kelimpah ari nya lebuh ke ngenang bekaul enggau kilang ke diabas, Darell madahka diri temegah ati ngagai kilang nya mekuh ngagai mayuh barang plastik tang ngemeratka pemanah rampa menua.
Ngelalu sereta nyempulang Darell ngabas kilang nya kemari, Managing Director Elim Industries Sdn Bhd George Lee He Liong enggau ke bukai.