MIDF udah ngagihka RM885.9 juta kena mantu 889 kompeni di Sarawak
KUCHING: Malaysian Industrial Development Finance (MIDF) kenyau ari taun 1960 udah ngagihka RM885.9 juta dikena mantu 889 kompeni di Sarawak, ku Direktor Tusun Pengawa MIDF Dato’ Charon Mokhzani.
“Kitai mantu kompeni dalam nengeri tu ngerembai lalu ulih besemekih ba makit antarabansa.
“Sekeda kompeni ke dibantu diatu udah ba rintai kompeni dalam bursa saham,’ku iya ba program Licha Otomasyen enggau Industri 4.0 ba siti hotel ditu, kemari.
Program dipenyadi Menteri Dagang Antarabansa enggau Industri Darell Leiking.
Iya nambah sepenyampau RM14.5 biliun udah diagih di serata Malaysia ungkup tuju ke sama dalam timpuh nya.
Charon mega madah diak ba maya ke diatu, MIDF benung ngintu agih belanja ke dikumbai skim duit injau perintah ba penyampau RM2.5 bilion.
“Nengah skim tu kitai ngarap ulih mantu kompeni di menua tu ba pengawa ke bekait engau otomasyen, ngemansang pengawa gudang nguna teknologi baru, nambah seraya ngemanah asil gudang.
“Servis pengangkut ( nganjung asil gudang) mega dikearap ulih diangkatmanah lalu mujur ba makit ekspot,’ku iya.
Nitihka penerang Charon, MIDF netapka bayar empat peratus (bungai) ari penyampau injau ungkup timpuh setaun.
“MIDF nyendia duit injau ke komprehensif ngagai pengawa dagang enti dibandingka enggau ijinsi bukai.
“Kitai keran nyendia servis pekara wang ke manah, timpuh mayar ke panjai tang ba peratus ke mit.
“Kompeni ke nginjau ari MIDF udah mujur ngerembai lalu sida udah mayar duit injau nya. Duit nya deka diinjau ngagai kompeni ke bukai,’ku Charon.
Ungkup taun tu ku iya nambah, MIDF nagit ulih nyendia duit tambah ba penyampau RM800 juta ungkup kompeni mit enggau jelan pemesai (SME) di serata menua.
Ari penyampau nya, RM500 juta diungkup ngagai pengawa gudang, RM200 juta ungkup kompeni ke ba pengawa nyendia servis lalu laluh RM100 juta ungkup SME.
Licha ke diatur kemari digulu lebih 100 iku penyereta ke alai sida diberi penerang sentang gaya ekonomi enggau pekara ke bekaul enggau industri 4.0.