Kelab Pemancing Miri deka ngatur pekit nginti kena 29 Oktober
MIRI: Dikena ngelakuka pengawa nginti lalu nambahka penyedar bekaul nyaga pemeresi sungai sereta ngadaka rampa menua ti gadung ba mengeri Miri, Kelab Pemancing Miri sekali agi ngatur Pekit Nginti Sungai Miri kena 29 Oktober tu ila.
Jurujaku pengatur pekit Vincent Lo madah pekit nya tebuka ngagai semua sida ti rindu ka pengawa nginti lalu deka digaga ba Muara Sungai Miri berengkah ari pukul 8 pagi nyentuk 12 tengahari.
“Perais mata duit deka diberi ungkup 10 iku pemenang ti udah mujur nitihka atur pekit.
“Tiga penuduk ti pemadu tinggi deka mai pulai perais mata duit RM3,000, RM1,000 enggau RM500 sereta kereban nginti ari TCE Tackles,” ku iya.
Ungkup penuduk lumur empat nyentuk penuduk lumur enam, sida deka mai pulai perais mata duit RM300, RM200 enggau RM100 sereta kereban nginti ari TCE Tackles.
Perais khas iya nya mata duit RM300 deka diberi ngagai pemenang ti mujur mechahka rikod ika seberat 30.1 kg ke atas.
Hari bulan kepenudi nganjung penyereta iya nya kena 27 Oktober sebedau pukul 3 lemai.
Bayar masuk iya nya RM35 meseti dibayar sebedau hari bulan kepenudi lalu sida ti laun dipinta mayar RM50.
Pom ti lengkap enggau bayar masuk pekit ulih disua ngagai Chop Hock Cheong Hin Fishing Tackle (016851558), Ek Fatt Sport Fishing Enterprise (085-431659), Tho and Son Fishing Trading (016-8703747), Soon Ming Trading & Servicing Co. (085-654392), X Gear (085413680) tauka New Tackle Enterprise Permyjaya (085414307).
Pesereta ti deka mayar ngena akaun bank ulih mayar ngagai Kelab Pemancing Miri Sarawak ba Alliance Bank 1102-7001-0018-311.
Sida ti ingin nyereta pekit tu ulih betelefon ngagai Lo ba lumur 017-8029002 ungkup penerang ti silik bekaul bayar bank tauka pekit.