Rayat di nengeri tu ngenggaika undang-undang imigresyen diubah ungkup pemaik rebak baru lalu GPS deka bebendar ngetanka pekara tu

LUNDU: Rayat Sarawak dekaka undang-undang imigresyen di nengeri tu ngambi enda diubah ungkup pemaik rebak baru.

Sapit Kepala Menteri Datuk Amar Doughlas Uggah Embas madah, beserimbai enggau tu Gabungan Parti Sarawak ( GPS) deka terus ngetan ngambika undang- undang imigresyen nya enda diubah ungkup pemaik rayat.

“Endang udah nyadi tanggungpengawa kami deka ngetanka udang- undang imigresyen tu ngambika enda diubah ungkup rayat Sarawak, kelimpah ari negika isu minyak petrol enggau ke bukai,” ku iya.

Iya madah munyi nya lebuh ti bejaku ba pengerami Pemesai Begulai enggau Rayat ba Balai Komuniti Lundu kemari.

Sama bisi datai iya nya Kaban Kunsil Nengeri Tanjung Datu Datuk Amar Jamilah Anu.

Ku Uggah ke mega Menteri Betanam Betupi Moden, Tanah Adat enggau Pemansang Kandang Menua, GPS andal ulih ngetanka hak rayat nengah pemisi 19 iku kaban Parlimen.

Ku iya, perintah udah meri agih belanja RM2 juta ungkup projek betanam betupi di sitak Lundu.

“Agih belanja nya deka dikena bala pekebun meli benih enggau betanam betupi sereta mega bisi ngaul diri dalam projek betupi baka kambin.

“Aku deka berunding enggau Opis Betanam Begtupi sentang pemansang pengawa betanam betupi di kandang menua Lundu,” ku iya.

Endang udah nyadi tanggungpengawa kami deka ngetanka udang-undang imigresyen tu ngambika enda diubah ungkup rayat Sarawak, kelimpah ari negika isu minyak petrol enggau ke bukai. Datuk Amar Doughlas Uggah Embas Sapit Kepala Menteri