Pesereta projek HAB Tabung Haji PELITA Beladin nerima insentif ungkup taun 2018

PUSA: Pesereta Projek Pemansang Tanah Adat Bansa Asal ( HAB) Tabung Haji PELITA Beladin Sdn Bhd udah nerima insentif sida ungkup taun 2018.

Projek tu ti mungkur pemesai 991 hektar endur projek betanam sawit udah ditumbuhka kenyau ari taun 2009.

“Sekumbang timpuh nya, 533 iku pesereta di sitak Beladin/Semarang tu udah nerima urung RM5 juta insentif.

“Lalu ba taun tu, penyampau insentif ti dibayar ngagai pesereta iya nya RM477, 057.60, lalu tu iya nya bayar insentif kali ke-12 kenyau ari taun 2009. Projek tu udah nyapai setuju entara semua raban ti bekaul iya nya Tabung Haji Sabah enggau Sarawak (THSS), Lembaga Pembangungan dan Lindungan Tanah (PELITA) sereta pesereta di kandang menua tu kena 17 Ogos 2005 lalu insentif berengkah dibayar kenyau ari taun 2009,” pia ku Pemesai Projek Bagi Menua Selatan Graman Ausi Kanang.

Iya ke bejaku munyi tu lebuh ti dikerandau pengarang berita maya Pengerami Nyuaka Insentif (Tunai) ti bepalan di Balai Komuniti Kampung Beladin bedau lama ti udah.

Sama bisi datai maya pengerami nya Menijer La- dang TH Semarang Haji Muhammad Termeze bin Mat Nor, Menijer Kanan Ladang TH Tanjong Lilin Rosli Ahmed Khalil, Chairman Komiti Pemansang Kandang Menua Beladin Haji hassan Aman, sereta pesereta ti nerima insentif.

INSENTIF TAUN 2018: Pesereta ari sitak Beladin enggau Semarang ti udah nyereta Projek HAB Tabung Haji Beladin tu bebaris ngambi insentif sida dalam mata duit.

TERIMA MIH: Graman (dua kiba) nyuaka chek ngagai pengari Projek HAB Tabung Haji PELITA Beladin Hj. Hassan Aman maya pengerami ti diatur ba Balai Komuniti Kampung Beladin bedau lama.

NYINUK: Sekeda ari pesereta Projek HAB Tabung Haji Beladin ti bisi datai ninga penerang lebuh pengerami nyuaka insentif di Balai Komuniti Kampung Beladin, bedau lama.