13 buah IPT di Borneo ngambi bagi dalam ‘Festival Tari Borneo 2018 (Edisi VII)’

BINTULU: Sepenyampau 13 buah palan pelajar tinggi (IPT) ari pulau borneo nyengkaum menua Brunei Darulssalam enggau Kalimantan Indonesia deka ngambi bagi ba ‘Festival Tari Borneo 2018 (Edisi VII)’ ti diatur Universiti Putra Malaysia Kampus Bintulu (UPMKB) ke deka diatur 30 Oktober nyentuk 4 November ila.

Pekit tu ila deka digaga bepalan di Dewan Sri Kenyalang lalu tetiap tim ti ngambi bagi deka mantaika tanda sida enggau kreatif.

Bisi tujuh buah palan pelajar tinggi ari menua tu ti deka ngambi bagi ba pekit tu ila iya nya UPMKB, Universiti Teknologi Mara (UiTM) Sarawak, UiTM Sabah, Universiti Malaysia Sarawak (UNIMAS), Universiti Malaysia Sabah Kampus Antara- bangsa Labuan (UMSKAL), Kolej SIDMA Sabah enggau Kolej SIDMA Sarawak.

Ungkup penyereta ari Indonesia, lima palan pelajar tinggi ti ngambi bagi iya nya Universitas Borneo Tarakan, Universitas TanjungPura Pontianak, Universitas Palangka Raya, Universitas Lambung Mangkurat sereta Universitas Mulawarman lalu penyereta ari Brunei diarika Universiti Brunei Darussalam.

Nitih ku penerang ti diterima, kena 28 Oktober, bisi digaga ‘ Showcase Festival Tari Borneo’ ti bepalan ba Commerce Square Mall berengkah ari pukul 2 nyentuk 6 lemai.

Raban pengatur nesau mensia mayuh di kandang menua Bintulu kelebih agi ti rinduka pengawa betanda datai bebala mayuh ngagai Balai Sri Kenyalang ngambi sama meda program di atas panggau tu ke udah ngaul selampur Borneo seraya lalu ngerichahka program tu ila.

Entara batang tuju pengawa tu diatu iya nya dikena nerenakka runding talukka pengawa seni tanda asal ungkup raban nembiak rebak baru kelebih agi sida ti ba palan pelajar tinggi.

Beserimbai enggau nya mega tu dikena ngemeranka runding ulih begulai enggau pangan diri kelebih agi di pulau Borneo tu ke ulih begulai entara pupu bansa nengah pengawa betanda.

Masuk meda pekit tu ila nadai bebayar ngambi mayuh agi orang datai meda pekit tu ti ngempung mayuh macham jenis tanda di pulau Borneo tu.