PKDS begunaka sukung semua komuniti Dayak selampur nengeri
KUCHING: Urung 315 iku kaban baru mujur direjister Gerempung Main Asal Dayak Sarawak ( PKDS) beserimbai enggau Aum Besai Dayak (PKD) ke diatur ba Palan Aum Borneo Kuching (BCCK) apin lama ke udah.
Chairman iya, Judah Anom madah bansa Dayak mesti ngaga identiti di Sarawak baka Rumah Dayak. Beduduk ari nya, PKDS begunaka sukung semua komuniti Dayak ba selampur nengeri tu dikena nyapai juluk nya.
Ngelansa pekara ke sebaka, nengah penerang media Pemantu Sekretari PKDS Candida Entri Demong madahka tuju PKDS muka bansal tu rambau PKD ngambika gerempung tu dikelala mensia mayuh sereta nyadi palan endur ngerejista kaban baru.
“Juluk keterubah gerempung iya nya deka nirika Rumah Dayak ungkup mayuh aktiviti raban bansa Dayak selampur Sarawak enggau Malaysia. Tu bepelasarka pemujur Rumah Dayak ke bisi ba Rumah Bentang di Pontianak Indonesia,” ku iya.
Nangkan nya, ku iya PKDS deka ngatur mayuh aktiviti main asal, seni, enggau lumba Dayak awakka diangkat, dipelajar, ditemu sereta enda punas ngapa nyentukka uchu ichit.
“Taja pia, dikena ngemujurka juluk tu begunaka sukung ari semua piak sekalika dalam menua tauka menua luar,” ku iya.
Kenu ku iya, entara sukung dikena ngulihka diri nyadi kaban PKDS iya nya dipinta mayar panjar RM50 ungkup kaban seumur idup. Nulung nesau ngagai kaban belayan ke besemak awakka sida bela ulih nyadi kaban kelimpah meri sukung ari sukut belanja.
PKDS ku iya agi begunaka belanja dikena meli taba tanah dikena nirika Rumah Dayak. Peransang tauka buah penemu ke manah dikena ngemujurka juluk endang beguna amat, ku tandu Candida.
Bela bisi datai nyadi pesereta program PKD sereta nyaup ngemujurka aktiviti keterubah PKDS tu iya nya Mandal Chairman PKDS Jessman Bujang anak Ameng enggau Sekretari PKDS William Mangor.