Jematan besi ba Rh Undi ti beungkus RM100,000 dibuka ungkup mensia mayuh
KAPIT: Jematan besi beungkus RM100,000 ba Rumah Undi Langkau, Nanga Plak Sungai Bena, Sut Kapit udah dibuka ungkup mensia mayuh. Jematan ti digaga ari baruh Projek Transformasyen Menua Pesisir (RTP0 tu udah dipenyadi Kaban Parlimen (MP) Kapit Datuk Alexander Nanta Linggi begulai enggau Kaban Kunsil Nengeri (ADUN) Pelagus Wilson Nyabong Ijang.
Sama bisi datai iya nya ketetiga Sekretari Politik Kepala Menteri – Maurice Giri, Tapah Ata enggau nicholas Kudi, Sapit Direktor Opis Betanam Betupi Kapit Badin Unor, Kunsilor Jantai Maseng, Kunsilor George Tang, Wallce Hitler, Ambrose Abong Bugek, Alexon Nila, Watson Awan, tuai rumah sereta bala temuai ke bukai.
Pengerami ngemunka jematan besi nya mega digaga beserimbai enggau ngintu Hari Malaysia ti disambut kena 16 September tu tadi.
“Kami endang besai ati nerima penatai kita semua saritu, lalu endang untung laban kededua MP enggau ADUN bisi mega datai bejadika pengerami tu. Nembiak redak ari baruh pegai aku beterima kasih nuju Nanta seduai Nyabong ti udah bebendar nentuka pemujur projek jematan besi tu ke endang meri pemaik ungkup kami di kandang menua tu,” ku Undi lebuh ti bejaku ngelalu penatai temuai ba pengerami nya.