34 iku penerejun deka mantaika pengelandik ba ‘Sibu International BASE Jump 2018’

SIBU: ‘ Sibu International BASE Jump 2018’ udah berengkah kemari nyentuk 23 September tu di Dataran Bandar Sibu Fasa I.

Bisi 34 iku penerejun deka mantaika pengelandik sida terejun ari ringkat perabung begunan ti pemadu tinggi di Sarawak, Wisma Sanyan.

Atur pengawa ngelepaska bala pesereta kemari udah dipenyadi Chairman Kaunsil Mengeri Sibu (MPS) Datuk Tiong Thai King enggau Residen Bagi Menua Sibu, Charles Siaw.

Pesereta tuan tu iya nya penerejun datai ari Amerika Syarikat, Australia, Belarus, Belgium, Kanada, Estonia, Finland, Peranchis, Jerman, Ireland, Malaysia, New Zealand, Russia enggau United Kingdom.

Taun tu, program nya deka ngayanka penyelai iya nya bala penerejun deka ngena gari ‘ Super Hero’ baka Superman, Batman, Iron Man, Hulk, Captain Amerika, Wonder Women enggau mayuh agi lebuh ti terejun.

Penyelai tu iya nya beserimbai enggau pengerami ngintu taun ke-10 program Sibu BASE Jump tu udah diatur.

Pesereta ari Belgium Corentin Parmentier ti beumur 24 taun iya nya penerejun ti pemadu biak lalu penerejun ti pemadu tuai iya nya Eric Pemberton ari New Zealand ke beumur 65 taun.

Renggat sekali tu mega bisi disereta penerejun indu iya nya Michelle Kaszper ari Kanada, Angela Proudfoot (USA), Emilie Berges (USA), Julie Owen (USA), Susanne Lampe(Jermany), Courtney Smith (USA) sereta Felicia Sturgenn (USA).

Berindik ari tu, mensia mayuh kelebih agi ari kandang menua tengah Sarawak ditesau sampal datai meda pengerami tu.