30 iku nembiak UPMKB ngulu Program Graduet Begulai enggau Komuniti di Kpg Ulu Segan
BINTULU: 30 iku nembiak ari Universiti Malaysia Kampus Bintulu (UPMKB) udah ngulu Program Graduet Begulai Enggau Komuniti Zon Bintulu ti digaga ba Kampung Kuala Segan, bedau lama ti udah.
Entara aktiviti ti bisi digaga semanjai program iya nya slot woksyop akademik ungkup subjek Jaku English, Matematik enggau Sains ti nagit ngagai nembiak sekula primari lalu tu nyengkaum slot licha ngangkatka tikas akademik nembiak sekula primari enggau sekondari, sereta mega bisi randau integriti ungkup peranak di genturung pendiau nya baka woksyop nambahka pengelandik nyumai, nyait enggau pemajik ungkup sida ke indu.
Program nya digaga bala nembiak enggau kerejasama ari pengelicha sereta staf UPMKB ti begulai enggau Opis Pengintu Pengelantang Komuniti (KEMAS) mega dikena nerenakka runding ti ulih begulai enggau mensia mayuh nengah pengawa volunteer, talukka menua sereta integriti ungkup bala nembiak ti ngulu program nya.
Beserimbai enggau nya, bala nembiak UPMKB ti ngulu program tu mega sama bisi enggau ngatur pengawa beripai meresi sereta nyeruri Balai Mayuhguna Kampung Kuala Segan sereta bisi nanam pun buah kelai pemeri sida ungkup peranak di genturung pendiau nya.
Program Graduet enggau Komuniti tu iya nya program ti diatur Opis Menteri Pelajar Malaysia ( KPM) ti dipejalai di selampur nengeri Sarawak beserimbai enggau Bulan Merdeka tu.
Lima zon ti udah dipilih bejalaika program tu sereta iya nya di Bagi Menua Bintulu, Miri, Sibu, Betong enggau Kuching.
Berindik ari nya, program tu dikearap ulih mandangka ngagai raban graduet dikena ngena penemu ti udah dipelajar sida enggau matih pengelandik begulai enggau orang mayuh ke lalu ulih ngadaka graduet ti ngembuan runding ke ulih nyadi volunteer ti siru sereta bebasa enggau pangan diri.