Diatu Indu Opis SPRM (Kuala Lumpur) benung ngereja tanggungpengawa sida nitihka pematut lalu enda takut
KUCHING: Kaban Kunsil Nengeri (ADUN) Padungan ari Parti Tindakan Demokratik (DAP), Wong King Wei ngansak Opis Nagang Pengawa Makai Suap (SPRM) pampang Sarawak ngereja tanggungpengawa.
Bejaku ba aum pengarang berita di Indu Opis DAP ditu kemari, iya madah Indu Opis SPRM (Kuala Lumpur) udah ngereja tanggungpengawa nitihka pematut lalu enda takut.
“Pengudah Pakatan Harapan (PH) numbuhka perintah baru, SPRM diberi pengelantang bejalaika tukik ba barang sapa aja orang.
“Menteri Besai ke dulu, diatu benung ditukik SPRM lalu iya bisi 32 tuduh.
“Enda nemu nama kebuah SPRM Sarawak mengkang diau diri lalu enda bejalaika tukik ba sekeda pemesai kitai ditu,” ku Wong.
Iya nambah riput polis udah kala digaga ba siku pemesai Sarawak ke dituduh bisi ngaul diri ba ulah makai suap.
SPRM Sarawak ku iya baka ke enda bejalaika tanggungpengawa ke dikereja kaling sida di Kuala Lumpur.
“Aku ngansak SPRM Sarawak muka baru fail lalu ngadu tasat ba tuduh ngereja pengawa makai suap ba siku pemesai Sarawak.
“Enti sida enda ulih ngadu tasat tu, aku minta Direktor SPRM Sarawak ngetuka diri,” ku Wong.
Ngenang kaul bukai, Kaban Parlimen (MP) Bandar Kuching Kelvin Yii ke bela ngulu aum pengarang berita nya madah DAP Sarawak deka ngadu licha sentang Chukai Servis enggau Jual (SST).
Enda nemu nama kebuah SPRM Sarawak mengkang diau diri lalu enda bejalaika tukik ba sekeda pemesai kitai ditu. Wong King Wei ADUN Padungan
Kelvin madah licha nya diadu nengah saup Brilliant Inspiration Academy (BIA) lalu deka diatur di siti hotel ditu kena 29 September 2018 berengkah jam 6 lemai.
Dua iku speaker udah dikangau meri licha iya nya Sapit Direktor Opis Kastam Noelle Lily Morse ke alai iya deka bejuraika sentang ‘Get To know SST’.
Speaker kedua iya nya Ketuai Unit Bekal Rega enggau AntiPencatutan Sarawak, Robin Emerson Empurai ari Opis KPDNKK lalu iya deka bejurai sentang ‘Consumer Rights”.
Kelvin nagit ulih matak 1,000 iku orang maya nya ila lalu tikit benung disadung diatu.