UPP minta perintah nyendia mayuh agi penerebai bilun ke Sarawak

KUCHING: Presiden Parti Rakyat Bersatu (UPP) Dato Sri Wong Soon Koh bisi merambu ngagai Menteri Besai Tun Dr Mahathir Mohamad minta perintah nyendia mayuh agi penerebai bilun terus ke Sarawak.

Wong ke nyadi Menteri Pekara Wang II sereta Menteri Dagang Antarabangsa enggau E-Dagang ngenataika perambu nya rambau nguluka penemuai basa delegit UPP ba opis Dr Mahathir di Putrajaya kemari.

Ba penemuai nya, Wong enggau Dr Mahathir berandauka pekara pemansang Sarawak jemah ila nyengkaum gaya politik di nengeri tu.

Wong ukai semina merambu nambah penerebai bilun terus ke Sarawak tang bela minta infrastruktur dagang temuai di serata Sarawak diangkatmanah.

Kenyau Dr Mahathir nyadi Menter Besai ke tujuh ba bulan Mei tu tadi, seduai nyentuk ngagai diatu udah tiga kali betemu.

Ba randau nya mega, Dr Mahathir bekunsika tenung politik iya enggau raban ketuai UPP ke alai iya madah sida semua rayat Malaysia tang semina bebida parti politik.

Menteri Besai ngarap diberi sukung enggau kerejasama ari UPP ngambi ulih nentuka menua tu meruan likun sereta majak mansang.

Dr Mahathir enggau nyemetak madah deka mutarka isu utang menua nyadi pekara ke dulu dikemerat.

Berindik enggau nya iya minta semua peranak Malaysia enda ngira orang politik tauka bala mayuh sama bela begulai enggau iya ba pengawa ngurangka utang menua.

Bela nyempulang Wong, Sapit Presiden Datuk Dr Jerip Susil ke mega Menteri Muda Pengangkut, Sekretari Besai George Lo enggau Ketuai bagi Nembiak ke mega ADUN Engkilili Dr Johnichal Rayong Ngipa.