Jaga pemakai dikena nyeliah ari kena penyakit kemi manis, ku Dr Sim
KUCHING: Mensia mayuh dilalau sama bejaga ari kena penyakit kemi manis, dikena nentuka peranak Sarawak pemadu mimit betapi enggau penyakit nya.
Menteri Kaunsil Kandang Menua enggau Pengawa Berumah, Datuk Prof Dr. Sim Kui Hian madahka pengawa nagang penyakit kemi manis ukai patut semina dilempaika ngagai bala lutur sereta indu misi aja.
Iya madahka mayuh chara dikena meri penyedar sereta nagang penyakit nya nyadi kelimpah ari nyaga pemakai diri.
“Dikena ngelaban diabetes kitai begunaka macham chara, lalu sehari tu kitai ngena chara ti nyelai ke dikanggau Karathon (dikena meri penyedar).
“( Nengah Karathon tu) Aku ngarapka mensia mayuh ukai semina datai belagu sereta ukai semina datai meri duit tang terus nyadi duta meri penyedar pasal kemi manis tiap hari.
“Kitai deka ke peranak Sarawak pemadu mimit tauka baruh betapi enggau penyakit kemi manis,” ku iya bejaku seraya bejadika Kara- thon 2018 ditu, kemari.
Dr Sim ngarika Kepala Menteri Datuk Patinggi Abang Johari Tun Openg bejadika Karathon 2018 ti diatur Diabetes Malaysia Cawangan Negeri Sarawak ba East atrium, Vivacity ditu.
Abang Johari bisi ngung- kupka geran sepenyampau RM15,000 ngagai Diabetes Malaysia Pampang Nengeri Sarawak dikena bejalaika macham aktiviti penyedar.
Lebuh ti ngenang pasal program tauka aktiviti nya kemari, Dr Sim madahka diri temegah ati ngagai Diabetes Malaysia Cawagan Negeri Sarawak ti bejalaika tanggungpengaw dalam raban bansa lalu meri penyedar pasal penyakit nya.
“Laban tanggungpengawa meri penyedar pasal penyakit kemi manis tu ukai semina dilempaika ngagai perintah aja, tiap iku kitai patut champion ngelaban penyakit kemi manis.
“Raban bansa patut champion ngelaban penyakit kemi manis, ukai semina bala lutur enggau indu misi laban enti enda pia tu enda ulih diputarka,” ku iya.
Dulu ari nya, Chairman Diabetes Malaysia Cawangan Negeri Sarawak Dr William Voon dalam jaku pengelalau madahka keterubah iya sida ngatur Karathon.
Nitihku iya, program tauka aktviti nya dikena ngiga belanja mimit kelimpah ari ti ngarapka ungkup belanja ari perintah.
“Tu keterubah ngatur Karathon. Tuju iya dikena ngiga belanja laban kitai patut nambahka belanj dikena mantu raban bansa ti begunaka bantu.
“Nambahka nya dikena meri penyedar lebih agi kes baru kemi manis,” ku iya seraya ngarapka perintah terus chakah mantu gerempung ukai dikuasa perintah ( NGO) ari segi belanja dikena bejalaika aktiviti penyedar enggau mantu orang ke patut.
Sama bisi datai ba program nya kemari, Chairman Pengatur Karathon 2018 Tommy Sim enggau ke bukai.