Aktiviti fizikal baka lumba, main beguna amat dikereja dikena nyapai pengelantang pengerai dalam komuniti

SIBU: Sukung enggau kaul mensia mayuh dalam mayuh macham aktiviti fizikal baka lumba enggau main beguna amat dikena ngadaka komuniti ti gerai sereta regas.

Kaban Parlimen (MP) Sibu, Oscar Ling madahka aktiviti fizikal beguna amat dikereja dikena nyapai pengelantang pengerai dalam komuniti.

“Berindik ari nya, beguna amat bisi penyedar ti deka ngubah diri ngemeranka aktiviti fizikal kenyau ari umur biak tauka raban nembiak.

“Idup ti regas enggau gerai deka meri pengelantang pengerai lalu ngurangka penyakit,” ku iya nerang.

Oscar mansutka jaku nya lebuh bejadika Gegar 10,000 Singkang Merdeka Renggat Bagi Menua Sibu di Stadium Tun Zaidi, kemari.

Nitih ku iya, atur pengawa sekali tu datai ba taun ke lapan pejalai aktiviti nya lalu majak nerima timbal ti manah ari komuniti.

“Kaul bemacham ejensi mega ngayanka aktiviti Bejalai 10,000 Singkang tu

Berindik ari nya, beguna amat bisi penyedar ti deka ngubah diri ngemeranka aktiviti fizikal kenyau ari umur biak tauka raban nembiak. Oscar Ling MP Sibu

udah ulih diterima, lalu nyadi antara atur pengawa meseti digaga maya sesebuah ejensi nya ngatur aktiviti tauka program ti ngaul pengeregas,” ku iya.

Ku Oscar, aktiviti sekali tu udah matak sepenyampau 200,000 pesereta ba 100 endur serata menua.

“Nyentuk sehari tu, nama Opis Menteri Pengerai (KKM) mujur ditukuka ‘The Malaysia Book of Records’ nyadi ‘ Penyertaan Paling Ramai Secara Serentak Dalam Kempen Kesihatannya’,” ku iya nerang.

Ba lansa bukai, Oscar madahka aktiviti bejalai 10,000 singkang manah ungkup se- mua renggat umur nadai ngira bansa enggau pengarap.

“Tau dikereja kediri aja, bekaling, begulai enggau diri sebilik tauka begulai enggau bala bakih chara beraban.

“Muntang amat, ngelimat belanja enggau mai pemaik ngagai pengerai enti dikemeran,” ku iya.

Berebak enggau nya, Oscar mega bisi nyuaka setipikit ngagai pemenang ti ngarika bagi menua Sibu ba Konvensyen Health Promotion in Learning Institution (HePiLI) Doktor Muda Peringkat Negeri Sarawak 2018.

Sama bisi datai Pemesai Pengerai Bagi Menua Sibu, Dr Teh Jo Hun.

MERI PENGAGA ATI: Oscar (dua kanan) nyuaka setipikit ngagai raban Sekula Primari Kampung Bahagia Jaya bulih lumur dua pekit projek begulai enggau komuniti, penuduk lumur tiga pekit inovasyen kereban bantu ngajar Kelab Doktor Muda sereta lumur dua pekit intervensyen pelajar pengerai Kelab Doktor Muda.